E cifranan ta refleha e ahustenan conforme e Plan di Impuesto y e esfuersonan continuo riba tereno di compliance
Departamento di Impuesto ta un departamento di gobierno cu tin e tarea pa garantisa entrada di impuesto y pa facilita e contribuyente pa por cumpli cu su debernan fiscal. E ta un tarea cu un responsabilidad grandi pa cu presupuesto di Pais Aruba y e presupuestonan di otro instancianan di gobierno manera ATA, TPEF, AZV, SVB, DIMAS y DIP.
Den e prome mita di aña 2023, Departamento di Impuesto a registra un total di 1.069 miyon florin na entrada. Di e suma aki, a colecta un total di 550 miyon florin (51%) na entrada di impuesto y 519 miyon florin (49%) na toeristenheffing, primanan di AOV/AWW y AZV, erfpachtscanon y entrada pa gasto di permiso di DIMAS.
Entrada compara cu aña 2019 y 2022
Compara cu 2019, e entradanan ta na 19% riba e nivel di entrada di aña 2019, e aña prome cu pandemia. Compara cu aña 2022, tambe a registra un aumento significativo di 38% den e entradanan di impuestonan directo y indirecto di e prome mita (januari te cu juni) di aña 2023. E subidanan di e entradanan compara cu 2019 y tambe 2022 ta refleha entre otro e ahuste di e porcentahe di BBO entrante 1 di januari 2023 y e ahuste y reparticion di entradanan di toeristenheffing.
E entradanan di impuesto directo y indirecto a aumenta cu 38% compara cu e entradanan di e mesun periodo di aña 2022 y nan ta representa 62% di e presupuesto di Pais Aruba di aña 2023. E entradanan destina pa otro instancia a aumenta cu 11%. E aumento di e entrada total di e prome mita di aña 2023 ta 23% compara cu aña 2022.
Plan di Impuesto 2023 y Compliance
E cifranan ta indica claramente e efectonan di Plan di Impuesto 2023 y e esfuersonan continuo di Departamento di Impuesto encuanto e cumplimento (compliance) pa cu impuesto. Alabes e cifranan ta mustra e efectonan positivo di e recuperacion di e economia di Aruba.
Pa loke ta “compliance”, Departamento di Impuesto ta trahando duro pa por mehora esaki aun mas. Staf y personal di Departamento di Impuesto ta haciendo nan maximo esfuerso pa facilita e contribuyente pa por cumpli cu nan debernan fiscal. E meta final ta pa e contribuyente ta consciente di su deber fiscal y ta cumpli na tempo cu esaki evitando asina costonan adicional di boet of interes.
Como ciudadano di Aruba nos tin e deber pa cumpli cu nos responsabilidad di declara y paga nos impuestonan na tempo cu ta na bienestar di nos mes y di nos pais.
Gerencia di Departamento di Impuesto
