Aruba a lanta ayera bao di un awasero torencial cu tabata compaña di strena cu lamper. Esaki a causa cu scol a keda cancela, molester significante na diferente area di e isla interupcion di coriente na algun bisindario tambe.
Prome cu orario di scol ya caba mayornan y diferente otro usuario ariba Facebook tabata mustra nan preocupacion y tabata puntra si scol ta wordo cancela of no. Mirando e situacion y e peliger cu esaki por trece ariba caminda, Minister di Enseñansa y Deporte, Endy Croes, a anuncia oficialmente ariba su pagina di Facebook cu scol a keda cancela.
“Feliz mainta Aruba. Debi na e situacion di tempo y riba conseho di Meteo, ta cancela tur scol awe,” e minister a publica ariba Facebook.
No ta un secreto cu diferente area rond di Aruba tin problema cu inundacion cada biaha cu awa yobe duro. E area di centro di ciudad, cerca di e terminal di barconan crucero, a inunda rapidamente pa motibo di e awasero. Esaki ta trece cune tambe cu awa sushi a bin ariba y un holo stinki ta apodera di e area aki.
Area di Palm Beach tambe a conoce inundacion pa motibo di e awasero pisa y ademas di esaki pa motibo di e biento fuerte cu tabatin na dado momento, dilanti di Barcelo Hotel un mata grandi a cay ariba trottoir blokiando asina e paso pa peatonnan.
Den e area di Malmok tambe e biento fuerte a ocasiona cu dos mata a cay. Un di nan a cay riba caminda y a stroba trafico cu ta core for di Arashi direccion pa Oranjestad. Personal di limpiesa a yega na e sitio pa cuminsa kita e matanan for di caminda pa asina trafico por pasa y pa despues finalmente kita e mata for di e caminda por completo.
E otro mata cu a cay tabata mas chikito y esaki no a stroba trafico, pero si tabata stroba e paso di peaton ariba e trottoir.
Den e area di Madiki tambe tabatin inundacion. Residentenan di e area a tuma e trabao den nan propio man y a cuminsa bari e sushi cu e awasero pisa ta trece cune cu ta blokia e sistema di rioolering. E residentenan tabataa pafo den awasero ta bari y desblokia e rioleering pa purba laga e awa core pa evita un inundacion mas grandi.
Becinadarionan pariba di brug tambe tabata inunda pa e awasero pisa di ayera mainta. Usuarionan di Facebook a publica videonan caminda por mira e camindanan bao di awa y trafico pega na diferente parti di e isla.
Diferente medio di comunicacion a reporta tambe cu den e area di Bakval debi na e awasero y biento pisa cu tabatin, na un sitio di construccion un stelashi a cay riba un auto y a causa daño kibrando e windshield di patras di e auto.
Na Savaneta tambe na Rancho Clemente, segun diferente medio di comunicacion a publica, un boto mara na e pier lo a sink pa motibo di e awasero.
Un poco prome cu 8or di mainta ELMAR NV a indica a traves di nan pagina di Facebook cu diferente bisindario rond di Aruba a experiencia interupcion di coriente pa motibo di un lamper cu cay.
“Debi na blikseminslag, nos ta confrontando problema den distribucion di coriente den diferente area rond di nos isla. Nos tecniconan ta trahando duro cu diferente ploeg rond di nos isla eherciendo nan trabou cu maximo precaucion pa garantisa seguridad di cada un, pa asina por cuminsa reestablece suministro di coriente mas pronto cu ta posibel,” e publicacion a indica.
E awasero pisa ta debi na e tormenta tropical Franklin cu a forma den region di Caribe. Departamento Meteorologico Aruba a anuncia dialuna ariba nan pagina di Facebook cu Aruba lo sinti efectonan di e tormenta. “Tormenta tropical Franklin ta treciendo abundante humedad y instabilidad den region. Durante e proximo 24 ora esaki por produci algun awasero cu por wordo acompaña pa lamper cu strena. Localmente awasero por ta modera te fuerte y causa molester.”
