(AP) — Prome minister Canades, Justin Trudeau riba dialuna a acusa Facebook di pone ganashi riba seguridad di hende durante e emergencia crea pa e temporada cu candela forestal record na Canada.
Meta, compania mama di Facebook y Instagram, a anuncia anteriormente e berano aki cu lo cumpli su promesa di blokea contenido noticiero for di Canada riba su plataformanan pa motibo di un ley cu ta rekeri gigantenan tecnologico pa paga editornan pa link of uso di nan contenido online.
Candela na Canada a saca diesmiles di hende for di nan cas y a menasa ciudadnan manera Yellowknife, capital di Teritorionan Nortoccidental. Como 30mil persona tabata bao orden di evacuacion na British Columbia.
“Actualmente, den un situacion di emergencia unda informacion local actualisa ta mas importante cu nunca, Facebook ta pone ganashi corporativo prome cu seguridad di hende,” Trudeau a bisa na un conferencia di prensa na Cornwall riba Prince Edward Island. “Ta asina incomprendible cu un compania manera Facebook ta scofe pa pone ganashi corporativo prome cu sigura cu organisacionnan di noticia local por hiba informacion actual na Canadesnan,” e prome minister a bisa.
Ministernan di Gobierno a haci un yamado na Meta diabierna pa retira su prohibicion di noticia na Canada, cu ta aplica na noticiero como tambe medionan nacional manera e Canadian Broadcasting Corporation.
E compania, cu sede na Nort di California, a keda firme riba su decision bisando den un declaracion tocante e candela cu hende na Canada por sigui usa Instagram y Facebook “pa conecta cu nan comunidadnan y haya acceso na informacion confiable incluyendo contenido di agencianan gubernamental oficial, servicionan di emergencia y organisacionnan no-gubernamental.”
Residente- y bishitantenan na e pais no por mira ni comparti noticia riba e rednan social propiedad di Facebook, incluyendo articulo di noticia, video y audio di noticieronan paden of pafo di Canada.
Meta no ta su so den e accion aki. Propietario di Google, Alphabet, tambe a bisa cu tin plan pa retira link na noticia Canades den respuesta na e ley nobo, maske ainda no a hacie. E Ley di Noticia Online, aproba na juni despues di un debate largo, ta programa pa drenta na vigor mas laat e aña aki.
“Esaki ta escogencia di Facebook,” Trudeau a bisa. “Den un democracia, periodismo local di calidad ta importante, y awo mas cu nunca ta importante ora hende ta preocupa pa nan cas, preocupa pa nan comunidad, preocupa pa e pio berano pa eventonan extremo cu nos a yega di tin den hopi tempo.”
Premier di British Columbia, David Eby a bisa cu ta inaceptable cu Meta no a reverti su decision pa blokea noticianan Canades di ser comparti online. “Mi ta haya mi mes babuca cu nos ta na e etapa aki di e crisis y e doñonan di Facebook y Instagram no a bin dilanti bisando ‘nos ta purba di haci un punto cu gobierno federal, pero ta mas importante pa hende ta safe,’” Eby a bisa.
El a agrega cu hopi hende na British Columbia ta depende riba media comparti riba Facebook pa haya acceso na informacion di e candela.
Meta a tuma stapnan similar den pasado. Na 2021, brevemente a blokea noticia for di su plataforma na Australia despues cu e pais a pasa legislacion cu lo obliga companianan tecnologico paga editornan pa usa nan noticia. Despues a yega na un acuerdo cu editornan Australiano.
