(AP) — Republicanonan den Congreso Mericano ayera a cita varios agente di FBI y IRS involucra den e investigacion federal riba yiu di presidente Joe Biden, Hunter Biden, mientras e partido ta evalua si ta habri un investigacion riba e presidente e herfst aki.
Lidernan di comitenan di Hudiciario y Ways and Means a exigi testimonio di cuatro agente cu a traha riba caso di Departamento di Husticia riba e yiu homber mas jong di e presidente y su asuntonan di negoshi y impuesto.
“Nos deber ta pa sigui e hechonan unda cu nan por hiba nos, y nos citacionnan exigiendo testimonio di oficialnan di administracion di Biden ta crucial pa compronde con e yiu di e presidente a haya trato special di fiscalnan federal y ken tabata esun tumando e decisionnan final den e caso,” segun congresistanan Jim Jordan di Ohio y Jason Smith di Missouri a bisa den un declaracion.
Ambos homber, hunto cu presidente di Oversight, James Comer a uni forsa na juni pa habri un investigacion riba loke nan a bisa ta interferencia amplio y inadecua den e caso di perfil halto.
Un enfoke di e investigacion congresional ta un reunion na october di 2022 unda fiscal di Delaware, David Weiss kende tabata a cargo di e investigacion riba Hunter Biden supuestamente a bisa investigadornan cu e no tabata “e persona cu ta dicidi si ta entrega cargo” y cu den varios instancia su esfuersonan pa trece cambio den varios hurisdiccion a keda rechasa. Esaki segun Gary Shapley, empleado di IRS kende tabata den e sala.
Tanto Weiss como Departamento di Husticia a rechasa e declaracion di Shapley.
Shapley y otro empleado di IRS, Joe Ziegler a testigua den Congreso cu tabatin un patronchi di “stapnan investigativo slow” y retraso den accionnan di cumplimento den e caso di Hunter Biden, incluyendo durante administracion di Trump den e lunanan prome cu eleccion 2022.
E cartanan di citacion manda dialuna na e cuatro persona – dos di IRS y dos di FBI – ta bisa cu a “identifica nan como un persona cu conocemento directo” di e reunion na october.
E movida di e Republicanonan ta bin apenas un siman despues cu Procurador General Merrick Garland a nombra Weiss como consehero special den investigacion di Hunter Biden, un movida cu a sorprende hopi, incluyendo Republicanonan den Congreso cu tabata pushando pa e designacion.
Den su comentarionan dia 11 di augustus, Garland a nota e “circunstancianan extraordinario” di nombra Weiss como consehero special despues cu combersacionnan pa un acuerdo di culpabilidad a fracasa den berano. Weiss a pidi pa keda nombra consehero special, hayando autoridadnan amplio pa investiga y reporta su hallazgonan.
