(FitchSolutions) – Fitch Solutions ta premira cu economia di Aruba ta bay reduci for di e crecemento real calcula di GDP di 6.2% na 2022 na apenas 2.0% na 2023.
Den un articulo publica na maart ultimo, e compania di servicio financiero Fitch Solutions a duna un analisis di e crecemento economico di Aruba cu un perspectiva algo diferente na loke ta scucha di otro bandanan.
Segun Fitch Solutions, “e reduccion di crecemento ta bay revela inflacion ainda eleva y esfuersonan di gobierno pa consolidacion fiscal, como tambe efectonan base despues di un crecemento economico fuerte despues di pandemia.
Sector turismo ta bay ta e impulso principal pa crecemento, cu yegadanan superando nivelnan pre-pandemia na 2023. E ora nan ta pronostica crecemento di GDP real moderando modestamente na 1.2% na 2024, a pesar di reduccion di presion inflacionario sosteniendo entrada real di hogarnan y gasto di consumidor.
Segun nan pronostico, economia di Aruba ta bay reduci notablemente na 2023. Nan ta pronostica crecemento di GDP real di apenas 2.0% na 2023, significantemente menos cu e 17.2% na 2021 y un crecemento calcula di 6.2%.
Crecemento economico den ultimo dos aña tanata infla pa un base estadistico abao, cu GDP real reduciendo cu 18.6% durante pandemia di Covid-19 na 2020. Adicionalmente, yegadanan di turismo for di exterior a bolbe na 98% di nivel di 2019 na 2022, tambe sosteniendo e crecemento economico robusto registra den kwartaalnan recien. Aruba ta un di e economianan mas dependiente riba turismo na mundo, cu Conseho Mundial di Biahe y Turismo calculando cu e sector normalmente ta conta pa 70% di GDP y 90% di empleo.
E storia di crecemento aki, en gran parti positivo, ta parce di a yega su final. Na 2023, ta bay tuma e cifranan di crecemento for di un base estadistico hopi mas halto. Inflacion eleva tambe ta bay pisa riba ingreso disponible real pa hogarnan, afectando confiansa di consumidor y gasto. Inflacion a yega na 6.6% compara cu e aña anterior na januari 2023, principalmente pa motibo di aumento di gasto di cuminda (12.8%), vivienda (12.4%) y transporte (9.6%).
Como economia di un isla cu ta importa mayoria di su cuminda y energia (88% di su mix di energia ta cubri pa importacion di combustible fossiel), Aruba ta bay keda exponi na prijsnan global mas halto pa commodities resutlando for di e guera na Ucrania. Ta pronostica cu inflacion ta bay tin un averahe halto di 5% na 2023, for di 6% na 2022.
Efuersonan di gobierno pa consolidacion fiscal tambe ta bay reduci crecemento di GDP real na 2023. Atuba tin un carga di debe di gobierno pisa (79% di GDP pronostica pa 2023) y mester implementa medidanan fiscal pa adheri na e condicionnan mara na sosten di likides duna pa Hulanda durante e pandemia. E presupuesto di gobierno di Aruba pa 2023 tin meta pa un surplus di 1% di GDP, pero Fitch Solutions ta pronostica cu esaki ta bay resulta den un deficit di 0.1% di GDP, dus no logrando e meta.
Sinembargo, e esfuersonan pa reduci e deficit ta bay afecta crecemento, cu e deficit fiscal na 2023 probablemente siendo hopi mas chikito cu e deficit di 17.4% di GDP registra na 2020, mientras ta retira sosten social y ta aumenta tarifa di impuesto. Pa aumenta entrada, gobierno a aumenta BBO na 7% desde januari 2023, y a implementa BBO na frontera. Ademas, gobierno a elimina medidanan di estimulo cu a sostene gasto di hogar, incluyendo seguro di desempleo y un pausa den colecta di BTW. Fitch Solutions ta nota cu e plan ta pa aumenta BTW di 6% pa 14%, maske e implementacion di esaki a keda retrasa, y ta premira cu lo introduci BTW na comienso di 2024 ora inflacion reduci mas notablemente.
Sector turismo ta bay ta e motor principal di crecemento na 2023. Esaki ta bay refleha yegadanan relativamente stabiel for di Merca, Canada y Hulanda, cu hunto normalmente ta provee mas cu 80% di yegada di turista. Un nivel record di yegada di turista ta probable na 2023 contribuyendo na e cuenta coriente registrando un surplus di 3.1% di GDP na 2023 segun nan pronostico, un cifra limita pa prijs di commodities refirsando e balor di e factura di importacion. Tambe desempleo ta bay cay na 5% durante 2023 segun nan pronostico, un reduccion for di e 6% na 2023.
Fitch Solutions ta nota, sinembargo, cu e habilidad di e sector pa impulsa crecemento ta bay ta menos cu na 2022. Inflacion eleva y tasanan di interes aumentando probablemente ta bay continua siendo un peso riba entrada disponible real den mercadonan clave pa turismo, reduciendo e entrada disponible pa gasto discrecional riba biahe. Ademas, limitenan riba capacidad den sector turismo ta bay limita crecemento den e sector.
Segun AHATA, ocupacion di hotel tabata na 88% di nivelnan di 2019 na 2022. Esaki ta laga espacio pa un aumento den estadia na hotel na 2023. Den su Economic Outlook Report di maart, Banco Central di Aruba a resalta cu maske proyectonan di construccion existente den sector di turismo lo continua na 2023, “ningun proyecto grandi a keda identifica pa impulsa crecemento di inversion na 2023.”
Fitch Solutions ta pronostica cu crecemento di GDP real ta bay modera modestamente na 1.2% na 2024, a pesar di reduccion den presion inflacionario dunando sosten na entrada real di cvada hogar y gasto di consumidor. E capacidad pa crecemento mas fuerte ta limita, mientras Aruba ta acomoda na un trayectoria menor a largo plaso. Esaki ta bay refleha sector turismo operando cerca di su capacidad, e posicion fiscal debil di gobierno, e dependencia di e pais riba gobierno Hulandes pa sosten di likides, y un falta di diversificacion den e economia en su totalidad. Economia di Aruba ta bay keda casi completamente dependiente riba e pronostico di sector turismo pa e futuro cercano, lagando e isla exponi na cualkier recesion economico mundial significante of inespera.
Nota: E comentario aki ta publica pa BMI, un compania di Fitch Solutions, y no ta un comentario riba Fitch Ratings Credit Ratings. E data y comentarionan den e rapport aki ta deriva puramente di BMI y fuentenan independiente. Analistanan di Fitch Ratings no ta comparti data ni informacion cu BMI.
