Diasabra ultimo, a bira conoci e noticia di un funcionario di Cuerpo di Polis di Aruba cu a keda envolvi den un accidente di transito unda supuestamente otro medionan local a sigura cu e funcionario tabata bao influencia di alcohol y a nenga pa keda deteni despues cu a causa e accidente.
Den e caso aki, ta trata di un funcionario cu un rango halto di Cuerpo Policial di inicialnan K.P., cual tabata stuur un auto di trabou y dal otro auto cu tabata staciona, segun e mesun medionan local cu a reporta esaki. Nan a señala cu e polis en cuestion a supla y e nivel di alcohol tabata mustra cu tabata intoxica, pero e no a keda deteni.
Un hecho cu a causa mal contento den comunidad mirando e caso serio aki na unda ta trata di un polis di rango halto cu mester duna ehemplo na comunidad caminda ta bin dilanti e dicho “si bo ta bebe, no stuur.”
Mediante un comunicado di prensa diasabra ultimo den oranan di atardi, Cuerpo di Polis di Aruba a informa cu nan ta lamenta e sucedido di diasabra madruga pa loke a sucede cu e colega di nan como tambe e otro coleganan cu tabata na e sitio.
E caso aki ta wordo tuma na serio.
“Como polis nos ta mester duna un bon ehempel pa e comunidad. Vooral den funcionnan cu ta rekeri esaki. Nos ta compronde tambe e sentimento y emocion rond di e sucedido aki.”
Nan a bisa cu nan ta bay actua transparente y consecuente.
Mando policial a tuma medidanan interno pa cu e colega envolvi den e caso aki.
Den colaboracion cu Ministerio Publico a cuminsa un investigacion manera altocomisario di polis Sr. Ramon Arnhem a señala.
Igualmente a bira conoci cu e funcionario envolvi a keda suspendi di su funcion.
