Women’s Club of Aruba ta presenta seminario: “Adaptando na Cambio- Reforsando Mente, Transformando Bida”

Women’s Club of Aruba ta presenta un seminario pa inspira, pa keda innova continuamente y pa adapta na cambionan cu ta na caminda, cu e seminario aki nan tin e obhetivo di recauda fondonan pa por continua haci proyectonan pa comunidad.

Manera ta conoci, e club aki ta bin presentando cambionan pa asina crea un impacto mas positivo pa comunidad, asina ta informa Women’s Club of Aruba na unda cu diabierna 1 di september venidero pa 9:00am na Gloria Imax Theater e organisacion aki tin prepara un seminario cu ta titula “Embracing Change, it’s coming your way” (Adaptando na cambionan cu ta na caminda), esaki ta dirigi na tur profesionalnan cu tin interes di participa y ademas cu esaki Women’s Club of Aruba tin e obhetivo di recauda fondonan.

E seminario ta bay presenta na idioma Ingles pa varios orador y panelista inspirado, cu ta bay comparti conocemento valioso tocante sostenibilidad, inteligencia emocional, inteligencia cibernetico y hopi mas topico positivo.

E seminario aki ta pa nan por inspira nan mes, pa keda innova continuamente y adapta nan mes na cambionan cu ta na caminda, manera nan ta sigura.

E oradonan pa esaki ta Kathleen Reddick ken ta un invitado internacional, e ta un docente y director di Graduate Program in Management at St. Elizabeth University cu experticio den teoria di aprendisahe di adulto y capacitacion di desaroyo di recurso humano cu ta distingui su persona den mundo academico. Su influencia global ta extende den presentacionnan clave y rol di liderazgo, tambe ta boluntario activo di USO y ta empodera e comunidadnan a traves di clubnan social y cultural.

Crescenzia Biemans ta un hende muhe cu experticio den area legal y den hospitalidad sostenibel, cu un titulo cum laude di Universidad di Amsterdam den Ley, Politica, Psicologia, Economia cu specialisacion den Inteligencia Artificial y un master of Law.

Biemans ta director general di Tara Eco Supplies Aruba, un mayorista lider dedica den productonan pa hospitalidad sostenibel. Tambe e tin e rol fundamental den ekipo ehecutivo di e hotel Bucuti & Tara Resort, su liderazgo dinamico y compromiso cu sostenibilidad ta haci impulso di un cambio positivo den industria inspirando otro companianan pa adopta cambionan sostenibel.

Ademas tin otro invitadonan oradornan como Paul Eelens y Diederik Kemmerlin, ademas di Kathy Marino ken ta otro invitado internacional ken ta PHD den Gestion di Educacion Superior, Liderazgo y Politica di Seton Hall University unda a haya un master degree den Instructional Technology and MBA di Georgian Court University.

Durante 20 aña como director el a duna tayernan tocante Cyber Crimes, Digital Forensics, Hacking Cultures y Metodonan di Investigacion, ademas cu su experticio den administracion, educacion y antecedentenan den varios otro area tecnico y su pasion pa tecnologia, Dr. Marino ta brinda educacion esencia den tecnologia actual pa e lidernan di mañan.

Tambe ta bay tin panelistanan cu ta Charlène Nectar papiando di Flex Working, Tyson Lopez papiando tocante Digitalisacion way of working y Kareline van der Linden hunto cu Tristan Every, nan ta bay papia di organisational changes y e topico di changes in the workplace.

E prijs di e ticket ta US$120,-/ AWG. 216, esey ta inclui koffie di Starbucks henter dia, lunch for di P.F. Chang’s y Olive Garden y un cambio positivo den conocemento general.

Nan ta sigura cu e entrada di e charla ta pa recauda fondo pa por cubri gastonan pa e organisacion por haci varios proyecto social manera entre otro e proyecto anual “Dress a Child” den luna di december, “Student Award”, cu ta honra e miho graduadonan di tur tipo di scol secundario, eventonan social pa hende grandi y hopi mas.

Women’s Club of Aruba ta existi pa 89 aña na Aruba y ta un organisacion non profit y multifacetico dedica na mehora comunidad.

Pa join e seminario aki por cumpra ticket di entrada via Pay.aw of registra riba nan website https://womensclubofaruba.org/seminar-2023 Asina e persona ta registra, lo haya un e-mail di confirmacion pa haci pago. Si a paga caba, por manda e registracion cu prueba di pago na arubawca@gmail.com. Pa mas informacion tocante ticket por yama 593-6018.

Ademas, e organisacion ta informa cu si tin cualkier hende muhe cu kier contribui den comunidad hunto cu otro hende muhe maraviyoso por tuma contact cu nan via nan pagina di Facebook, Instagram, LinkedIn of via nan e-mail: arubawca@gmail.com, pa “laga sigui engrandece e club cu pronto ta celebra 90 aniversario y haciendo un diferencia den comunidad.”