Recientemente Minister Wever den colaboracion cu Comision Nacional di Sustainable Development Goals, Comision SDG, a organisa tres mainta di sesion di trabou pa conduci un evaluacion (nulmeting) di e mecanismonan cu Aruba tin pa avansa coherencia den maneho pa desaroyo sostenibel.
Desaroyo sostenibel ta consisti di tres dimensionnan, esta e aspecto economico, social y medio-ambiental. Ta esencial pa crea e harmonia y integracion den su totalidad pa por avansa sosteniblemente. Ta importante pa sigura cu maneho ta coherente y cu e diferente sector ta yuda otro y no ta traha contra otro.
Obhetivo di e evaluacion ta pa haya sa unda Aruba ta para actualmente y bin cu recomendacionnan den un plan di accion pa mehora e mecanismonan actual, mientras ta desaroya mecanismonan nobo unda ta necesario. E evaluacion ta den cuadro di meta 17.14 di SDGs, esta, “fortifica coherencia den maneho pa desaroyo sostenibel” y a wordo haci uzando e metodologia prescribi pa Nacionnan Uni den cuadro di e indicador pa e midi e meta aki.
E ‘scope’ di e evaluacion ta regarda e siguiente temanan: institucionalisacion di compromiso politico; consideracionnan riba termino largo; coordinacion inter-ministerial y cross-sectoral; proceso participativo; integracion di e tres dimensionnan di desaroyo sostenibel y analisis di e efectonan di maneho y alineamento/coherencia den maneho; monitoreo y reportahe di coherencia den maneho; recursonan financiero y instrumentonan financiero.
Pa fortifica coherencia den maneho pa desaroyo sostenibel tin mester di mecanismonan (procesonan y sistemanan) efectivo pa por efectua esaki continuamente. Mehoracion di maneho a base di mecanismonan efectivo ta un proceso compleho cu ta regarda e manera di traha di gobierno den su totalidad.
Mirando e complehidad di esaki, resultado di mehoracion di e mecanismonan lo ta a termino largo pa cual lo traha cu un ‘phased-approach’ den cual lo cuminsa traha riba e fundeshi necesario a corto plaso pa por realisa e metanan a largo plaso.
E nivel mas basico di coherencia den maneho ta pa identifica e compromisonan (trade-offs) y mitiga impacto negativo entre diferente sectornan. Na un nivel mas ambicioso, coherencia den maneho ta fortifica sinergianan cu ta reenforsa otro y sigura cu e maneho ta uno cu por wordo implementa, y sostenibel na mes momento. Esaki tur tumando den consideracion e perspectiva di e stakeholders concerni.
E evaluacion di a wordo haci bou guia di Ministerio di Asuntonan Economico, Comunicacion y Desaroyo Sostenibel, den colaboracion cu e Comision di SDG. E Comision di SDG ta un comision inter-departamental y inter-ministerial y a haci recomendacion con por mehora mecanismonan pa avansa coherencia den maneho pa desaroyo sostenibel.
Presente na e sesionnan tabata: Directie Buitenlandse Betrekkingen; Directie Economische Zaken, Handel en Industrie; Directie Natuur en Milieu; Directie Sociale Zaken, Directie Onderwijs, Directie Arbeid en Onderzoek; Centraal Bureau Statistiek; Directie Financiën; UNESCO-Aruba; representante di Ministerie van Algemene Zaken, Overheidsorganisatie, Innovatie, Ruimtelijke Ontwikkeling en Infrastructuur; y representante di Ministerie van Economische Zaken, Communicatie en Duurzame Ontwikkeling.
E meta ta pa a base di e resultado di e evaluacion y e recomendacionnan haci, pa cuminsa un trayecto pa desaroya un plan di accion pa mehora e coherencia den maneho pa desaroyo sostenibel.
“Coherencia den e dimensionnan di desaroyo sostenibel tin su complehidad y mester como base mecanismonan efectivo pa mehora coherencia den maneho pa desaroyo sostenibel. Colaboracion entre departamentonan y colaboracion inter-ministerial ta esencial den esaki. Nos a cuminsa encamina e trayecto pa traha riba e mecanismonan gubernamental pa mehora e maneho di desaroyo sostenibel. Esaki ta un proceso cu lo duna resultado long-term, pero pa cual e prome stapnan mester wordo tuma awo”, minister Wever a duna di comenta.
