Mester elimina visa… Y introduci amnistia…?

E siman aki nos a publica e noticia cu comerciantenan Venezolano ta pidi gobierno di e islanan (Aruba, Corsou, Bonaire) pa kita e exigencia di visa pa facilita nan pa por haci negoshi aki. E ta parce un peticion bastante aceptable, pero lo mester analiza e asunto aki den un cuadro un poco mas amplio. Ta logico cu e comerciantenan aki, principalmente di e teritorionan Venezolano mas cerca nos, ta mira nan interes economico personal promer cu tur cos, pero como pais nos, y Reino Hulandes, tin otro interes pa pone den balanza promer cu ta tuma un paso asina. Un di e interesnan mas importante pa contempla ta nos seguridad den tur sentido. Esey ta encera e vigilancia na nos costa y na tur nos puntonan di entrada for di exterior. Y, por ta cu e comerciantenan aki no por yuda, pero nan lo mester realiza cu nan ta ciudadano di e pais cu mas problema ta representa te awe riba nos continente. Ademas, e problemanan na e pais cu ta desborda den direccion di nan bisiñanan, entre nan nos mes tambe, no ta birando menos grave. E manera con e regimen Chavista ta trata e otro forzanan politico cu ta desea di participa na eleccion presidencial proximamente, y na e otro eleccionnan tambe, ta duna poco speranza cu algo ta bay mehora pa para e fluho di persona cu ta bandona e pais. Esey ta significa cu nos mester keda tene cuenta cu e realidad cu nos por keda haya mas migrante, legal o ilegal, cu ta bin complica e situacion economico y social aki.

Un di e problemanan cu nos mester enfrenta ta e presencia di miles di persona indocumenta, cu pa un parti chikito so a pidi e status di refugiado. Sin embargo, nos ta haya cu den publicidad ta duna e impresion cu ta trata di ‘migrante’ cu tur merece e mesun trato. Ta importante pa nos comprende bon con e situacion ta y kico ta e reglanan di nos mes y esunnan internacional cu nos mester respeta y aplica den cada caso. Manera bisa caba, ta un parti chikito di e ‘migrantenan’ a pidi y a haya e status di refugiado oficial. E otronan ta keda persona indocumenta cu en principio no tin nada ta haci na Aruba. Sin embargo, esey no ta implica cu nan no tin derecho. E mero hecho cu un pais tin hende indocumenta den su teritorio, ta bo mes ta keda responsable pa e situacion ey. Si bo no ta desea nan den bo teritorio, anto bo mester expulsa nan, asina simple, en principio. Kico ta e derechonan anto? Pasobra abo, e estado/gobierno di e pais, ta tolera nan den bo pais, e prueba di esey ta cu nan t’ey obviamente, ta haci cu bo mester cumpli cu cierto regla internacional. Por ehemplo, ora nan bira malo, ta humanamente imposible pa nenga un persona e tratamento medico adecua; y ken ta paga esey? No AZV, sino gobierno di e pais aki. Si acaso nan ta obliga AZV paga toch, esey por ser considera un ‘voorschot’ cu e fondo mester haya back despues. Nan yiunan, si nan tin nan aki, ta obliga pa tratado internacional pa haya educacion mescos tur ciudadano di e pais mes. Esey no ta duna e mayornan extra derecho; dia nan keda expulsa e yiunan ta sali hunto cu nan.

Amnistia?

Mirando e situacion di un grupo asina grandi presente caba, y e obvio necesidad di haya mas trahador for di exterior, ministro encarga cu Labor y Integracion a cuminza cu un tipo di ‘masahe’ tocante un amnistia, sin cu ta usa e palabra mes. E problema cu nos ta mira surgiendo ta cu ta bay hiba un maneho ‘de facto’ di amnistia pa migrante Venezolano, sin cu ta cana e debido proceso pa esaki. Den nos vision, un decision asina grandi ta requeri por lo menos dos asunto: uno, parlamento lo mester dicidi den e asunto aki, cu probablemente ta requeri un cambio di e Ordenanza di Admision y Expulsion, o un otro manera, como por ehemplo un ley special temporal. Dos, Reino Hulandes tambe tin algo di bisa den e asunto aki, y pakico? Pasobra legalizacion di un grupo grandi di migrante despues di tempo ta conduci na un grupo grandi cu ta bira eligible pa adquiri nacionalidad Hulandes. Y, nacionalidad no ta un asunto di Aruba sino di Reino. Nos tur sa cu awendia ni e pasaporte mes no ta prepara aki, ademas di e proceso di peticion y otorgamento, tur cos ta asunto di Hulanda.

Naturalmente nos por haya e critica di ta aparenta anti-stranhero o anti-Venezolano. Esey ta absolutamente no ta asina, nos ta consciente di e hecho cu e hendenan ta aki, cu nos como pais ta responsable, pero mescos ta exigi conducta segun ley di nos propio hende, nos mester atende e asunto di miles di stranhero indocumenta cu e cautela, pero tambe e firmeza y claridad legal cu e caso ta requeri. Pa bolbe anto na e asunto di e regimen actual y e clima politico na e pais ey; nos realmente no debe e regimen di Nicolas Maduro ningun fabor. Pa colmo, ta nan mes a cera frontera na 2019 y nos tin basta aña ta atende nos asuntonan sin mester di relacion comercial ni economico cu nan. Simplemente nos mester pone nos interesnan na promer lugar, y interes economico di un manyen di comerciante stranhero no por tuma promer plano.