Tabata dia 13 di mei di 2022 ora minister di Husticia y Asuntonan Social Rocco Tjon a informa comunidad tocante un MoU cu a ser firma hunto cu European Family Justice Alliance y Family Justice Center Aruba pa asina garantisa cu e tipo di ayudo y asistencia di European Family Justice Alliance por continua den futuro y den mesun linea cu esaki a formalisa Family Justice Center Aruba y reconoce su existencia.
E proyecto aki ta forma parti di Sociaal Crisisplan y mester a keda cla na october di aña 2021 pero esey no a tuma luga, den luna di juli ultimo minister Tjon durante un conferencia di prensa di Gobierno di Aruba, conhuntamente cu representantenan di Vecchia Estates N.V. a firma e “Letter of Intent” pa e construccion di e edificio pa Family Justice Center. Cu e Letter of Intent aki, Gobierno di Aruba a haci un compromiso, cu unabes e edificio pa loke ta trata Family Justice Center, Jeugd en Zeden Politie y Bureau Slachtoffer Hulp keda cla, Gobierno di Aruba lo cuminsa huur e edificio aki, pa asina ubica e tres departamentonan aki hunto.
Den esaki, tambe a sigura cu a tene cuenta cu tur e diferente aspectonan cu ta rekeri ora ta trata partinan infrastructural specificamente pa e departamentonan aki. Pues den e “programma van eisen” a tene cuenta cu “Verhoorkamers”; “Kindvriendelijke ruimtes”; “Studio verhoor kamer”; “Regie kamer”; “ophoudkamers verdachte”; “camera beveiliging”; “Intercom systeem”; “letsel ruimte forensisch arts”. Di e forma aki ta atene na tur e richtlijnen pa loke ta trata investigacion di casonan di abuso di mucha.
Manera ta conoci, den transcurso di aña pasa, a organisa e training “kindverhoor” pa e personal di JZP y tres psicologo cu ta sostene JZP den casonan mas dificil y complica y tambe den preparacion di menornan pa e verhoor. Banda di esaki a aumenta e cantidad di rechercheurs na JZP pa nan tin un team completo a base di nan formatierapport y a obtene tur e materialnan electronico pa por instala esakinan den e verhoorruimte di JZP.
Tambe por bisa cu a train e cadena social y hudicial hunto cu e European Family Justice Center Alliance con pa reacciona miho posibel den casonan di abuso domestico severo y “zedenzaken” y tambe pa compronde miho e dinamica den e casonan aki.
Hunto cu Ministerio y Departamento di Salubridad Publico (DVG) a logra pa Aruba tin su propio dokter specialisando desde maart 2022 pa bira medico forensico pa Aruba. Mientrastanto tambe a logra pa contrata un medico forensico for di Hulanda desde 1 di december 2022. E desaroyo aki tin bentaha y ta un logro pa cu e cadena hudicial, social y medico. Tambe por bisa cu a crea e contactonan y ta canando e caminda pa por bin cu e opleiding di recherche psycholoog pa tanto Aruba como e otro islanan den reino.
A organisa tambe un e-learning training di AUGEO foundation pa 150 profesionalnan riba e tereno medico, e training nan ta specifico riba e area medico y ta trata e temanan entre otro “reconoce señalnan di maltrato cerca pashentnan” y “con pa dirigi combersacionnan complica ora di preocupacionnan pa cu señalnan di abuso/maltrato di como menor of adulto”.
Cu esaki, por bisa cu e trabaonan pa Family Justice Center ta avansa pa asina por keda cla proximamente, sigur un instancia cu ta sumamente importante pa Aruba pa loke ta trata e topico di abuso di mucha cu lamentablemente ta sigui tuma luga.
