(AP) —E arsobispo di Colonia, un di e diocesis Catolico mas importante di Alemania, a expresa su decepcion diabierna cu empleadonan a uza computer di trabao pa purba haya acceso na websitenan di pornografia.
E declaracion for di Cardinal Rainer Maria Woelki a bin despues cu e corant di e ciudad, Koelner Stadt-Anzeiger, a reporta cu un lista for di e arsodiocesis a mustra mas cu mil intento pa haya acceso na websitenan asina for di su computernan. El a bisa cu docenas di empleadonan, incluyendo clerigonan mayor, a haci intentonan asina.
E arsodiocesis a confirma e existencia di un lista. El a bisa cu su proveedo di servicio IT ta check regularmente si “firewalls” ta blokia intentonan pa haya acceso na websitenan cu contenido vulgar manera violencia, pornografia y droga, y cu nan no tin e tarea pa check e historia di e usuarionan riba e computernan. El a bisa cu e check-up a resulta cu “ningun indicacion di comportamento criminalmente relevante.”
“Ta desapunta mi cu empleadonan a purba haya acceso na paginanan pornografico cu e ayudo di aparatonan cu arsodiocesis a haci disponibel pa nan trabao—aunke e firewalls a ser implementa,” segun Woelki.
“Pa algun, e consumo di pornografia por aparece inofensivo,” el a agrega. “Pero mi ta di acuerdo cu Papa Francisco, ken ta condena esaki y ta adverti di su peligronan, en particular e violacion di dignidad humano.”
E arsobispo a bisa cu el a puntra pa examina e incidente ora el a tende di nan. El a agrega cu e arsodiocesisnan tin hopi empleadonan “determina y confiabel.” E Arsodiocesis a bisa cu su investigacion interno a mustra cu Woelki mes no tabata un di e “usuarionan di websitenan incriminatorio,” segun e agencia di noticia Aleman dpa a reporta.
Fiscalnan di Colonia a conta dpa cu nan tin e lista di e arsodiocesis y ta examinando esaki, pero te awo no tin ningun sospecha di crimen y ningun investigacion andando. E asunto aki a bin na cla mientras cu e arsodiocesis ta experencia un crisis di confiansa rondonando Woelki, un conservador cu a bira un figura divisivo den e misa Aleman
Na 2020, Woelki a sconde un reportahe cu e tabata encarga cune riba con oficialnan di misa local a reacciona ora pastoornan a ser acusa di abuso sexual, citando preocupacionnan legal y poniendo hopi catoliconan local rabia. Un segunda reportahe, publica na maart 2021, a haya 71 caso cu oficialnan den rango halto cu a neglisha nan debernan.
E reportahe a absolve Woelki di cualkier descuido di su deber legal cu respet na victimanan di abuso. Despues el a bisa cu el a haci erornan den casonan den pasado envolviendo acusacionnan di abuso sexual.
Dos envionan di e Papa a ser desplega na Colonia pa investiga posibel erornan pa oficialnan mayor den nan maneho di caso. Nan rapport a resulta den e Vaticano dunando Woelki un “time-out” spiritual y a critica erornan grandi di comunicacion.
Na maart 2022, despues cu el a regresa, e arsobispo a bisa cu el a entrega un oferta pa renuncia. Papa Francisco ainda no a actua riba esaki.
