(NLTimes) – Hartstichting, KWF y Longfonds ta bayendo na e comision di codigo di avisonan pa purba di stop McLaren di promociona snus durante Formula 1 na Zandvoort. E benta di pakinan di nicotina aki ta prohibi na Hulanda, sinembargo promove snus ta permit, De Telegraaf a reporta.
Velo, e marca di e snus di tabaco Britanico-Mericano, ta tur caminda riba e auto di McLaren su ekipo. E auto aki lo ta visibel publicamente durante e careda proximo siman y den e publicidadnan rond di nan.
Snus ta un paki chikito di puiro cu ta contene nicotina. E usuarionan di esaki ta pone e puiro aki bao di nan lip. Snus ta prohibi na Hulanda si nan ta contene mas di 0.035 milligram di nicotina. Segun Telegraaf, snus usualmente tin 6 pa 15 milligram, cu algun di nan cu un cantidad di te hasta 65 milligram di nicotina. Mirando cu e producto no ta contene tabaco, e ta bay bao Warenwet y no Tabakswet, cual lo prohibi promove e producto.
Segun director di KWF Carla van Gils, e marca Velo di e auto McLaren ta mustra cu e industria di tabaco ta haciendo tur cos den su poder pa muchanan hoben keda adicto. “Pa sostene un negoshi cu ta mortal,” el a conta e corant. “Den nos opinion, esaki ta e contrario di bon gusto y decencia.”
Promocion no ta permiti encurasha comportamento cu ta dañino na e salud. KWF, Hartstichting y Longfonds lo usa e argumento aki den nan caso ora di presenta esaki dilanti Stichting Reclame Code. Experto den aviso Jan Driessen ta di acuerdo cu McLaren su movida ta uno di cual su intencion ta dudoso. “Si bo sa cu e benta di e pakinan aki no ta permit den e pais, bo no mester kier promove esaki como un marca cu tin impacto,” el a comenta, agregando cu uso di un ekipo deportivo pa promove un marca di snus ta extra malo. “Atletanan conoci tin un impacto y influencia riba e hobennan. Nan ta e heroenan real pa nan.”
McLaren y e tabaco aki no tabata disponibel pa contesta preguntanan di Telegraaf tocante e kehonan di e fondonan di salud.
