Secretario General di MEP ta splica cu e añanan di gobernacion di AVP no por wordo lubida sin mas. Ta masha hopi fabor politico tabatin y hopi ta esnan cu a “djodjo” cu placa di pueblo. Segun tin entendi no a cumpli cu pago di belasting tampoco. Dos di nan ta Speed Andrade y Patrick Paskel. Lo manda puntra Belastingkantoor tambe dicon nan ta haya handschoen y un trato preferencial. Chikitonan ta wordo masacra mientras e “carpatanan” Speed cu Patrick ta gosa.
Speed cu Patrick Paskel a cobra 8 miyon di Pais Aruba
E duo cu ta lastra tur hende tur merdia na nan antoho ta haciendo e trabou di oposicion pa Mike Eman. AVP falta liderazgo y ta den kiebro. Den AVP tin dos coriente. Esnan cu ta apoya e criminalnan condena cu castigo di prizon manera Benny Sevinger y Paul Croes, mientras tin un grupo ta pensa cu mester cambio di direccion y a cuminsa bula afo di e barco di corupcion. AVP door di esaki no tin forsa y no tin e cuero di cara pa hiba un oposicion fuerte. Aki Mike Eman a duna “ordo” riba e unico forsa cu e tin, esta riba Speed y Partick Paskel.
Speed Andrade y Patrick Paskel a cobra 8 miyon den 8 aña di gobernacion di AVP for di gobierno y companianan estatal. For di Pais Aruba un total di 6 miyon florin y di companianan estatal 2 miyon florin. Pruebanan aki tur t’ey y a saca copia y a entrega esaki na Parlamento. Tur 21 Parlamentario tin e pruebanan aki. Straño cu Gerlien Croes y Ryçond kendenan a caba di bandona e barco di corupcion nunca ta menciona nada di esaki. Nan tambe a haya esaki. Nan tin miedo? Asina bo kier defende pueblo? Un total di 6 miyon di placa di belasting Mike Eman y tur e ex-ministernan di AVP a regala Speed Andrade y Patrick Paskel den tur sorto di forma di contracto pa asina nan a gaba Mike Eman y AVP durante 8 aña largo.
Adicional e duo aki a cobra 2 miyon den companianan estatal manera Utilities, RDA, ELMAR y WEB pa nombra algun. Un abuso di marca mayor. Por corda cu Mike Eman a subi truck di Serlimar pa haci show y e duo aki mester ta grabando pa pretende cu Mike ta stima pueblo. Mike Eman riba truck di ELMAR den campaña y nan mester t’ey. Mike Eman a bay corta yerbe dilanti un cas no habita pa 10 aña y nan tabata t’ey pa gaña pueblo anto cobrando miyones.
Awe, Mike a ordena e carpatanan aki pa nan yuda AVP den oposicion y yuda AVP manipula e pueblo aki mescos cu nan a haci na 2009 cu e BBO. Esta gaña cu lo elimina BBO y nunca, pero nunca nan a cumpli cu esey. Es mas a haya BBO na 3% y a entrega esaki na 3.5%. Pues na e malandro amigo di Mike Eman di AVP pueblo mester keda atento cu nan campaña pa difama tur hende pa purba yuda AVP bini bek. Di awor ta manda mensahe pa nan cu nan no lo logra. Nan a yuda causa demasiado daño na e pais aki. Nan a defende maldad. Nan a yuda kibra Aruba financieramente. Nan a yuda causa e mega debe.
En bes di yuda educa nos pueblo pa hunto tur hende por prospera nan kier scoge e caminda di egoista esta hancho pa nan cu placa di pueblo y smal pa pueblo. Pueblo lo keda ricibi informacion di nan fechoria y abusonan pa asina nan tampoco no desgracia fondonan di pueblo na nan antoho manera nan a haci di october 2009 pa november 2017.
