Recientemente den un articulo publica riba medionan di comunicacion internacional, incluyendo Banca y Negocios, empresarionan Venezolano a pidi autoridadnan di Aruba, Corsou y Bonaire pa elimina e rekisito di visa pa Venezolanonan, ya cu ta sumamente dificil pa nan tramita esaki.

Juan Gotopo, vicepresidente di Camara di Comercio y Turismo di La Vela de Coro na estado Falcon, a informa cu ta preparando algun mision comercial tanto di Aruba como Corsou, pa bishita Venezuela y reuni cu e directiva di Fedecamaras.

“Na e momento aki nan ta realisando un catalog di producto, servicio y necesidadnan cu tin na e islanan a bin presenta esaki,” Gotopo a bisa.

El a expresa cu Venezuela a exporta door di La Vela de Coro, den tres luna, alrededor di 820 ton di fruta y berdura despues di e apertura di e frontera maritimo entre e pais Sur Americano y Corsou.

Igualmente, a indica cu dentro di e cantidad aki ta inclui 10 ton di pisca, y a resalta cu segun datonan di Secretaria di Exportacion di Gobernacion di estado Falcon, a exporta mas di mil ton di fruta y berdura entre e tres puerto di e entidad.

Gotopo a sostene cu ta a traves di La Vela de Coro unda ta exporta e mayor volumen di carga, sobre todo pa Corsou.

Gotopo a comenta cu pa agilisa e procesonan, ta necesario pa “elimina e visa” ya cu tin hopi comerciante chikito, mediano y grandi cu tin cu biaha pa Aruba of Corsou pa tuma contacto directo cu nan clientenan, y e tramite di visa a bira hopi dificil y complica.

El a pidi pa e islanan ABC elimina e visa pa e Venezolanonan: “Algun aña atras a kita e visa pa e Colombianonan, algun par di siman atras, Corsou a dicidi pa elimina visa pa Dominicanonan.”

Den Union Radio, el a puntualisa cu den e prome semester di e aña aki, 1,525 Venezolano a drenta Corsou y den luna di juli, 508.

Tabata na april di 2020 cu gobierno a anuncia cu ta introduci Visa y ESTA pa personanan di nacionalidad Venezolano, a base di Rijksvisumwet.

Minister di Husticia e tempo aya, Andin Bikker tambe a haci cambio den e Leisure besluit pa introduci tambe e ESTA comparabel cu e ESTA di Canada y Merca. ESTA, cu te e Electronic System for Travel Authorization, tambe a bira aplicabel specificamente pa hurisdiccion di Venezuela. Riba e cambionan aki, Bikker a haya hopi pregunta, entre otro cu si un persona di nacionalidad Venezolano cu permiso tambe mester di un Visa of un ESTA.

Bikker a splica e tempo aya cu esaki no ta e caso pasobra un Visa y un ESTA ta un permiso pa biaha como turista. Den caso di un persona di nacionalidad Venezolano ta residencia na Aruba y tin su permiso di trabao of otro tipo di permiso cu derecho di residencia pa largo tempo na Aruba, e Visa no ta aplicabel p’e. Den articulo 5 di Toelatingsbesluit ta reglamenta cu esunnan cu ta biba aki na Aruba no mester di Visa pa drenta Aruba, pasobra nan tin permiso di trabao.

Solamente e personanan cu ta bin Venezuela como turista mester aplica pa Visa of pa ESTA. Lo bay haci un screening si e personanan en berdad kier bishita Aruba como turista y despues regresa nan pais of cu nan tin otro intencion. E Visa y e ESTA netamente ta e instrumento pa controla kendenan ta bin como turista pasobra na final di dia Aruba ta un isla di mas of menos 115 mil habitante mientras cu Venezuela tin 19 miyon habitante. Aruba no por importa problema di Venezuela y esey Aruba ta haci cu mester salvaguardia Pais Aruba, su infrastructura y su industria turistico, segun un comunicado riba website di gobierno.