Ayera tardi fundacion Crea Conserva Cultura y Arte di Aruba (CCCA) a tene un conferencia pa anuncia e fechanan nobo di e musical ‘Mi ta un Artista’. Ferdinand Franca, director di e musical, a haci e anuncio aki y a elabora ariba e motibo pakico a pospone e musical inicialmente y kico ta e tema di e musical.
E musical ‘Mi ta un Artista’ mester a tuma luga den luna di juni pero pa diferente motibo esaki a keda posponi. Segun Franca ta indica, un di e motibonan principal pakico a pospone e musical ta pasobra e actornan mes a bisa cu nan kier duna e publico algo mas, cu nan kier duna e miho version di nan mes y algo cu calidad.
“Aña pasa nos a presenta e musical ‘Planta awe, Cosecha mañan’ cu a cosecha hopi exito. Nan a bisa nan no por presenta algo kico cu ta, nan bisa meneer nos mester duna e mesun nivel of mas. Esey ta un di e motibonan principal” Franca a remarca.
Esaki, el a señala, ta pas tambe cu un di e temanan den e musical cual ta pa e muchanan lucha pa nan soñonan, pa nan no rindi y nan sigui alcansa loke mas nan por.
Franca a anuncia cu e fechanan nobo di e musical ta diabierna dia 1 di september, 7:30 pa 10or di anochi y diadomingo 3 di september, 4or pa 6:30 atardi.
Gideon Testing, un di e actornan cu tin e papel di Hadapadrino Luchado a splica cu su personahe ta yuda Francine, e protagonista, lucha y realisa su soño. E ta yuda Francine realisa kico e kier haci y bringa tur e negativismo den su storia y den su bida.
“Trahando den e proyecto aki tabata hopi leuk, mi a gusta hopi y e ta saca hopi di mi creatividad. Bo por bisa cu mi caracter tambe ta un tiki goofy y esey mi a gusta hopi di e proyecto aki,” Testing a indica.
El a agrega cu el a yega di actua den diferente proyecto, pero esaki ta su prome biaha cu e ta actua den un produccion asina grandi.
Franca a splica a sigui splica cu den e storia e protagonista, Francine, ta pasa den diferente parti di lucha y e ta topa cu diferente hadapadrino cu ta hib’e den un mundo magico y nan ta yega Paris na un di e scolnan di baile principal cu tin.
Pa e musical tin diferente grupo di baile ta participa y aworaki tin gruponan di baile nobo cu a uni na e proyecto aki. Anteriormente Franca a menciona e gruponan di baile Club di Movemento, Step by Step, Kids & Youth in Action y grupo di baile di Jason Wester. E biaha aki a uni Popcorn Dancers y un grupo di baile di San Nicolas cu ta bay lansa e dia di musical nan grupo di baile y nomber oficial.
“Esaki ta un di e metanan di e musical y di fundacion CCCA pa stimula e gruponan traha hunto,” Franca a resalta.
Por ultimo Franca a extende su invitacion pa pueblo di Aruba pa asisti na e musical y apoya e hobennan talentoso. Caarchi ta disponible caba na Cas di Cultura y Plaza Bookshop na un balor di Afl. 25.
