Recientemente, bisiñanan di Perustraat a tuma contacto cu Bon Dia Aruba pa un situacion lamentable. Ta asina cu tabatin un famia Haitiano tabata biba na un cas, unda na dado momento nan a muda, lagando cantidad di articulo di cas atras riba caya, y pio ainda, nan a bandona nan dos cacho.
Na e cas na Perustraat por a mira corchon, sofa, stoof, wasmashin y otro articulonan cu e personanan a laga atras benta simplemente riba caya, lagando un situacion di incomodidad pa e bario. Pero loke mas a preocupa e bisiñanan tabata na momento cu a ripara cu a laga dos cacho atras na e cas.
Pa awor, e bisiñanan mes a bin hunto pa duna cuminda y awa na e animalitonan, cu ta hopi manso, bunita y lief. Sinembargo, esaki no ta un solucion permanente, y alabes no por spera cu e bisiñanan por keda para responsable pa e cachonan aki. Asina ta cu nan ta pidiendo ayudo di cualkier instancia concerni, of personanan cu ta dispuesto pa duna e cachonan aki un hogar cu e cuido y amor cu nan merece.
Ta conoci cu e fundacionnan encarga cu bienestar animal na Aruba ta haciendo un trabao incansable pero inmenso y no ta tur ora nan tin recurso financiero of capacidad di boluntario pa atende cu tur caso, pues e yamado ta bay pa comunidad di Aruba pa ta solidario y ban yuda e animalitonan aki.
Si tin algun persona cu kier yuda e bisiñanan, of kier adopta e cachonan aki, por fabor tuma contacto cu Bon Dia Aruba via noticia@bondia.com of riba telefon 582-7800.
