Ayera tardi durante un conferencia di prensa General Manager di Sagicor Life Aruba, Randall Croes, hunto Sonja Velthuizen, Sales Manager y Rafael Perez di IBISA a anuncia nan 5K Fun Walk en conexion cu celebracion di nan 35 aniversario.
E meta di e evento aki, Croes a splica, ta pa e clientenan di Sagicor Life, publico y nan empleadonan pasa un atardi cu hopi alegria den un ambiente agradabel.
“Nos ta hopi contento pa celebra un logro grandi cu nos coleganan y henter Aruba. Nos tin tremendo premionan pa duna e dia aki despues di e Fun Walk. Lo tin musica, un car show desde 10:00 or di mainta, un ehercicio pa warm up nos participantenan y hopi mas. Nos ta invita tur interesado pa registra na tempo prome cu esaki cera, pa sigura bo participacion na e evento historico aki,” Croes a menciona.
Participantenan por registra riba e website di Sagicor Life, www.sagicor.com. Contribucion pa e Fun Walk ta lo siguiente: Afl. 15.00 pa adulto y Afl. 10.00 pa mucha te cu 12 aña. Pago nan por wordo realisa por medio di IBISA. Cu recibo di pago e participantenan por pasa busca nan T-shirt na oficina di Sagicor.
Registracion lo tuma lugar te cu dia 24 di augustus, y buscamento di T-shirt lo ta diaranson, 23 di augustus y diahuebs 24 di augustus, desde 9:00 am te cu 6:00 pm y diabierna, 25 di augustus di 9:00 am te cu 4:00 pm na oficina di Sagicor Life.
Un maximo di mil persona por registra pa participa den e Fun Walk. Ademas di nan T-shirt, tur participante lo ricibi un medaya como recuerdo pa nan participacion na momento cu nan yega e meta final. .
Lo tin premio nan atractivo manera “dinner for two” y “weekend stay”. Velthuizen a remarca cu tur hende mester ta presente na momento di saca premio y tambe lo tin un premio pa e grupo mas anima.
Sagicor Life su Fun Walk ta bay tuma luga dia 26 di august y ta cuminsa pa 5:30 pm, na e oficina di Sagicor Life. Prome cu e caminata sali, ta bay tin un warm up cu lo tuma luga 5or di atardi pa tur participante prepara.
Prome cu e Fun Walk cuminsa ta bay tin mainta, for di 10or di mainta, un Car Show di autonan clasico pa tur e fanaticonan di autonan clasico por pasa wak y saca potret cu nan auto preferi.
