Tips importante pa comienso di aña escolar nobo

Comienso di aña escolar 2023-2024 ta den porta y pa cu esaki ta importante pa mayornan tene na cuenta algun aspecto cu ta esencial pa e desaroyo di e mucha na scol, su desempeño, concentracion y comportamento.

Mas cu claro ta importante pa e muchanan tin tur locual ta necesario pa por asisti scol y esaki ta inclui uniform nobo of den bon condicion, material di scol nobo of den bon condicion, sapato adecua pa bay scol nobo of den bon condicion, entre otro.

Pero esaki ta kita cu otro aspectonan psicologico, mental of personal ora cu ta trata di e mucha tambe mester tene cuenta cune.

Comunicacion ta hopi importante entre mayor y yiu. Por ta e mucha ta hopi emociona pa cuminsa scol back, of por ta esaki no ta asina pa algun mucha. Den caso cu e mucha no kier bay scol, ta hopi importante pa e mayornan papia cu e mucha y comunica pa asina purba di saca afo pakico e mucha no kier bay scol.

Esaki por ta debi na un cantidad di motibo, entre otro e mucha tin dificultad pa haci amigo, e mucha no gusta su juffrouw of meneer, e mucha ta wordo bully na scol of simplemente e tin dificultad pa sigui e lesnan.

Cualkier cu ta e caso, mayornan mester tin bon comunicacion cu nan yiu pa asina haci tur cos posible pa determina e problema pa asina purba yega na un solucion cu ta bienestar di e mucha y cu lo contribui na un aña escolar exitoso pa e mucha.

Si e mucha tin dificultad pa compronde un les of materia di scol, tambe ta importante pa e mayornan tin bon comunicacion cu e maestro di e mucha pa asina por busca e ayudo necesario pa yuda e mucha cu esaki y esaki na su turno lo mehora e desempeño y prestacion di e mucha na scol.

Durante vakantie hopi mucha ta perde nan rutina diario y ta drumi menos ora, ta drumi mas laat di loke ta custuma y ta lanta mas laat. Drumimento ta un aspecto esencial no solamente pa e desempeño di e mucha na scol, pero tambe pa su desaroyo y crecemento. Ta importante pa e muchanan descansa e cantidad di oranan stipula pa nan edad pa asina sigur un desaroyo y desempeño escolar optimal.

E cantidad di ora cu mucha mester drumi cu American Academy of Pedriatics ta recomenda segun nan edad ta: mucha di 2-3 aña mester drumi ta entre 12-13 ora, mucha di 3-6 aña mester drumi entre 10-12 ora, mucha di 6-12 aña mester drumi entre 9-11 ora y mas grandi nan bira menos ora ta necesario.