For di prome cu vakantie grandi a cuminsa e alumnonan di tur scol basico na Aruba a ricibi nan ‘Buki di Pret’. Un buki specialmente dedica na actividadnan cu e alumnonan por haci durante henter e temporada di vakantie grandi. Pa e ultimo weekend di vakantie grandi ainda tin actividadnan cu e muchanan por participa den dje.
Fundacion ‘Buki di Pret’ a bin cu e concepto aki pa regala na e alumnonan di tur e 49 scolnan basico na Aruba un biki cu ta yen di diferente actividad y ofertanan pa temporada di vakantie grandi.
Algun di e actividadnan cu e muchanan por a participa den dje cu nan ‘Buki di Pret’ tabata bishita na Dr. Horacio Oduber Hospital, bishita na Cuerpo Policial Aruba, caminata den naturalesa cu Gobernador di Aruba, bishita Santa Rosa Aruba, Aruba Animal Shelter, Donkey Sanctuary y hopi otro actividad y organisacion cu ta forma parti di e bunita iniciativa aki.
Ademas di esaki, den ‘Buki di Pret’ tin diferente oferta cu e muchanan por a disfruta di dje manera descuento na algun di e partnersnan di ‘Buki di Pret Aruba’ y hasta entrada gratis na algun lugar cu ta ofrece actividad pa mucha.
Esaki ta di tres aña cu Fundacion Buki di Pret Aruba a parti buki pa tur e muchanan di scol di basico.
