ELMAR ta reenforsando e team cu tecniconan adicional di Prysmian di Hulanda riba caminda pa yuda cu e situacion actual

Ayera a traves di un comunicado di prensa, Elmar NV a duna mas informacion tocante e suceso dia 8 di augustus ultimo, cu a laga areanan sin coriente pa varios ora.

Elmar a splica cu den proceso di construccion di un Onderstation nobo na Sabana Blanco, ta realocando diferente kabel di 60KV. Pa realisa e trabao aki, a kita carga di e kabelnan cu lo wordo realoca y transferi esaki pa kabelnan alternativo pa asina por sigui distribui coriente. Regularmente ELMAR ta realisa trabaonan sin interumpi e servicio di coriente door di transferi carga pa rutanan alternativo.

Manera ya ta conoci, diamars, 8 di augustus, durante e trabaonan tumando lugar na e Onderstation Sabana Blanco, un contratista encarga cu realoca diferente kabelnan a dal y daña e kabel di transmision di coriente di 60KV cu ta bay Onderstation Paardenbaai, cual ta suministra coriente na e area di Centro di Playa y vecindario. E suceso aki a resulta den un interupcion di servicio di coriente.

Elmar a interumpi e servicio di coriente den Centro di Playa inmediatamente despues cu e kabel a ser daña, pa evita cualkier potencial peliger y garantisa e seguridad di e tecniconan na e sitio di e incidente. Simultaneamente, pa isola e seccion daña di e kabel y scapa e restante di e kabel di transmision, y tambe e instalacion di 60KV.

Despues cu e tecniconan di ELMAR a isola e problema cu e kabel di transmision aki, a implementa un solucion pa transferi e carga di e kabel cu a kibra pa otro kabelnan. Esaki ta posibel door di e flexibilidad di e grid di coriente di ELMAR. Asina a reestablece e suministro di coriente den e area afecta via rutanan alternativo. Den tur situacion di interupcion di servicio, si ta posibel, ELMAR ta transferi e carga pa kabelnan alternativo pa reestablece suministro di coriente mas lihe cu ta posibel.

Manera ya menciona, regularmente ELMAR ta realisa trabaonan sin interumpi e servicio di coriente door di transferi carga pa rutanan alternativo. Pero e proceso di transferi carga por medio di otro kabelnan pa reestablece e suministro di coriente despues di e suceso na Onderstation Sabana Blanco a crea un situacion delicado, door cu e kabelnan alternativo tabata cargando un cantidad grandi di coriente adicional caba door di trabaonan cu ta andando na Onderstacion Sabana Blanco, den proceso di construccion di un Onderstation nobo. Esaki ta pone un desafio adicional pa e team di tecnico, door cu e suceso a resulta cu mester transferi e carga di un kabel daña pa mas kabelnan alternativo.

Door cu e tecniconan na e sitio a interumpi e servicio di coriente inmediatamente despues di e suceso, a scapa e restante di e kabel di transmision, y tambe e instalacion di 60KV. Manera ya menciona den e relato di ELMAR riba e suceso, inmediatamente despues di e suceso e team di GIS a cuminsa diseña un plan pa realoca e kabel di transmision di 60KV, trahando cu rapidez y seriedad pa trata e situacion actual. Desde dia 9 di augustus, e team di Underground Services (Kabelafdeling) a cuminsa ehecuta e plan pa drecha y realoca e kabel pa asina reestablece operacion normal. Alabes ELMAR ta reenforsando e team cu tecniconan adicional di Prysmian di Hulanda riba caminda pa yuda cu e situacion actual. E trabaonan aki lo tin un duracion di mas o menos 2 siman.

Tecniconan di Elmar lo monitorisa e situacion aki durante henter e periodo menciona. ELMAR ta mantene su compromiso pa informa nos comunidad tocante e desaroyonan y avancenan durante e proceso di reestablecemento. Pa finalisa, Elmar ta gradici su clientenan pa nan comprension y confiansa.