Na residencia di Embahador di Reino Hulandes na Washington DC a tuma luga un ceremonia di despedida pa Sra. Joselin Croes como Aruba su Minister Plenipotenciaro, GevMin, na Washington DC. Embahador Sr. Andre Haspels y su casa Sra. Bernie Haspels-Grootenboer a organisa e bunita recepcion di despedida aki pa nos GevMin y pa e ocasion aki Gobierno di Aruba a wordo representa pa Minister Xiomara Maduro. Durante e recepcion e mandatario a hiba palabra den nomber di Gobierno di Aruba pa gradici Sra. Joselin Croes pa e trabou haci pa representa Aruba dignamente na Washington DC desde aña 2018 pa 2023.

Den su discurso e mandatario a trece dilanti cu desde aña 2018, Sra. Croes a demostra di ta pro-activo den un forma extra ordinario y a logra hechonan remarcabel, semper poniendo Aruba riba mapa na Washington. ‘E amor di Joselin pa Pais Aruba den tur locual e ta haci ta evidente, ya cu el a sa di pone tur su energia y esfuerso pa logronan grandi pa Aruba. Su dedicacion, asistencia excelente, profesionalismo y preparacion ta hechonan cu nos ta balora y aprecia,’ asina Minister Xiomara Maduro a expresa den su discurso.

Riba e tereno di Educacion, Sra. Joselin Croes a traha incansablemente pa logra un cantidad di acuerdonan (MoU’s) y asina habri porta pa nos studiantenan na varios instituto educativo na Merca. Cu su esfuersonan a logra pa studiantenan di Aruba por haya e beneficio igual na studiantenan Americano di por paga ‘in-state tuition’ en bes di tarifanan internacional. Esaki a haci studiamento pa hopi di nos studiantenan di Aruba un soño alcansabel. Danki na su esfuerso Pais Aruba ta riba e lista di ‘Latin American and Caribbean Scholarship’ na estado di Florida. Un logro grandi considerando cu studia na Merca ta hopi costoso.

Sra. Croes a hunga un papel importante tambe den e evaluacion di Trafico di Persona. Danki na Joselin su gran esfuerso, Aruba a ricibi un evaluacion positivo y nos a ‘upgrade’ nos nivel, lo cual ta refleha nos compromiso pa cumpli cu exigencianan internacional.

Minister Maduro a trece dilanti cu como Minister di Finanzas e tabata testigo di e bon contactonan cu Sra. Croes tin na cu IMF y Banco Mundial. Su asistencia pa organisa e reunionnan cu un coordinacion impecabel tabata di suma balor pa e exito di Aruba.

Pa locual ta area diplomatico, Sra. Joselin Croes a asisti Prome Minister Evelyn Wever-Croes na e Asamblea General di Nacionnan Uni. Su planificacion den detaye y su boluntad pa haci esfuersonan adicional tabata bisto pa asina garantisa cu e agenda druk di MinPres a cana bon sin ningun problema.

Ademas Sra. Joselin a desempeña un papel fundamental durante e negociacionnan pa locual ta ‘Preclearance Treatment’ di US Customs and Border Protection na Aruba. Su perseverancia a resulta den negociacion exitoso cual ta hopi significativo pa nos Pais.

E logronan menciona ta djis algun ehempel di Sra. Joselin Croes su trabou den e ultimo 5 añanan. Tin hopi mas trabou cu a wordo haci y su impacto a haci Aruba renombra na Washington. Na final di e discurso Minister Maduro a presenta Sra. Joselin cu un recuerdo como muestra di gratitud y aprecio pa semper representa nos Pais cu dignidad y dedicacion. “Tur final tin un comienso nobo y p’esey nos ta desea Sra. Joselin Croes tur exito y felicidad pa futuro,” tabata palabranan di Minister Maduro na final di e discurso pa yama Sra. Joselin Croes danki pa e trabou haci como Aruba su GevMin na Washington.