Diamars anochi durante e programa di Noticiacla Live, parlamentario independiente Ryçond Santos do Nascimento a anuncia cu el a lanta su propio partido, yama Lucha Pa Reforma (LPR).

Segun Santos Do Nascimento a bisa durante e programa, e intencion ta pa reforma e aparato gubernamental, cuminsando cu Parlamento. E no a duna indicacion si e mes ta bay ta lider, con grandi e partido ta bay ta, ni tampoco a menciona ken e otro miembronan potencialmente lo ta.

Durante e programa, Santos Do Nascimento a bisa cu “e proceso ta cla di e parti legal” pa lanta su partido, cu Conseho Electoral a duna aprobacion pa lanta e partido. “Awo tin hopi otro aspecto cu mester traha riba dje.” Di e nomber, Lucha Pa Reforma, el a bisa cu e ta “hopi cerca di mi curason.”

“Tres aña pasa mi a hasta busca e domain name pa un website cu e nomber aki, y esey a bira tambe e nomber pa e partido, Lucha Pa Reforma.”

Tocante e cantidad di miembro den e partido, el a bisa: “Pa cuminsa ora bo bay notario bo no por lanta un partido bo so. Nos a opta si pa mantene e grupo cu ta firma na notario chikito, pero nos a tuma varios paso pa lanta e partido, y mi ta sinti contento cu e decision.”

Di loke ta diferencia su persona for di e otro partidonan cu tin actualmente, Santos Do Nascimento a bisa cu esey ta “mi posicion pa cu matrimonio, unda cu e mayoria di partido na Aruba ta pro-matrimonio homosexual. Ami ta vocifera cu mi ta contra, y esey ta haci cu mi mester wak un otro opcion, y e ora mi no ta wak un otro manera miho cu un plataforma diferente.”

El a recorda su salida na april ultimo for di partido den oposicion, AVP, bisando “AVP di mes no ta un opcion. MEP tampoco ta un opcion, es mas, mi a critica e sistema cu nos a bin ta hiba politica en particular ultimo dos aña di partido MEP; pero desde 2017 mi ta papiando caba cu mester hisa e nivel di politica na Aruba.”

E tempo aya, tabatin gran conmocion pa cu disputanan den e partido berde, cu diferente mencion di e palabra “integridad.” Santos do Nascimento e tempo aya tabata pidi e partido un reforma interno cu urgencia. Den diferente comunicado di prensa, Santos do Nascimento a keda riba e palabra “integridad” pero a bisa cu ta parce cu esey no a ser tuma na cuenta pa e partido berde, ya cu a keda confirma cu lider Mike Eman ta sigui apoya Benny Sevinger pa continua den su funcion como parlamentario, a pesar, cu a haya un condena di corte di prome instancia den cual a indica, entre otro, cu e no por eherce un funcion publico mas pa 5 aña.

E situacion aki tambe eventualmente a conduci na retiro di Gerlien Croes for di AVP, kende tambe a bira parlamentario independiente. No ta conoci ainda si Croes tambe lo ta integrante di LPR.