Ayera mainta durante un conferencia di prensa IBISA a anuncia e di 43 edicion di Turibana Race. Kamilah Dammers, Chef Schoolsport en Recreatie y Rafael Perez, Race Director a splica tur e informacion tocante e careda.
Dammers a remarca cu Turibana Race ta un careda cu tin añas caba y ta uno hopi conoci den e calendario tambe y uno cu hopi hende ta warda riba dje. E aña aki e careda lo ta diadomingo 10 di september. E careda lo cuminsa pa 6or di mainta y lo ta saliendo for di MFA Noord.
El a sigui splica cu e careda tin tres diferente categoria. Tin e categoria individual na unda un solo persona ta corre e 10.5 km completo, pero tambe mirando cu den e ultimo añanan e categoria di relay a bira popular, a pone e categoria aki tambe den e careda na unda dos persona ta comparti e distancia y cada un ta core 5.25 km.
Tin dos categoria di relay, tin e open relay na unda dos persona por competi hunto. E por ta dos hende homber, dos hende muhe, of un hende homber y un hende muhe (mix). E biaha aki tambe tin un categoria nobo cual ta e categoria di gubernamental, cu tin e mesun concepto di dos hende homber of dos hende muhe of mix.
Perez a splica cu IBISA den su afan pa promove deporte y salud y movecion y e aña aki a bin cu e categoria di ekipo duo of relay gubernamental special pa trahadonan di e aparato gubernamental. “Nos ta invita tur ambtenaar di Aruba, esnan cu ta traha na diferente ministerio, stichchting y NV’s gubernamental boso nan ta welcome, yega pasobra e ta bay hot,” el a indica.
Pa loke ta temperatura, el a splica cu den luna di september mester tene cuenta cu e temperatura y a lo largo di e ruta ta bay tin cuater post di awa pa e participantenan. El a indica cu normalmente pa un careda asina tin tres post, pero teniendo na cuenta cu september ta un luna cu ta hopi calor, a tuma e decision di pone cuater post di awa.
Na mesun momento el a haci peticion na tur participante pa prepara bon pa e careda aki. “Nos kier conseha tur persona cu ta participa por fabor hidrata bo mes bon. Ta bay tin un shower na e final di e careda pa bo refresca bo curpa, pero por fabor zorg pa bo ta bon prepara. E ta mustra un careda hopi facil, pero sa sucede cu e calor ta afecta e hendenan enormemente,” el a remarca.
Pa loke ta e premiacion, el a indica cu tur participante lo ricibi un medaya di participacion y pa e tres categorianan tin trofeo pa e ganadornan di i prome, di dos y di tres lugar.
E cantidad di participante pa e Turibana Race e aña aki ta 600 participante, di cual 400 ta individual y 100 ekipo duo (200 persona).
Pa registracion y mas informacion por subi e webstie d IBISA www.ibisa.aw.
