(Variety) – Claire Hope, e rapper Canades conoci como Lil Tay, a fayece cu 14 aña di edad segun su management a confirma na Variety.

“Cu hopi peso den nos curason nos ta comparti e noticia debastador di e fayecimento repentino y tragico di nos Claire stima,” Hope su famia a anuncia riba Lil Tay su pagina di instagram, cual tin 3.3 miyon siguido. “Nos no tin palabra pa expresa e perdida y dolor aki. Esaki tabata completamente repentino y a laga nos tur den shock. E fayecimento di su ruman homber tambe ta agrega un profundidad inimaginabel na nos luto. Durante e tempo aki di dolor inmenso, nos ta pidi encarecidamente pa duna nos privacidad, mirando cu e investigacion tocante nan fayecimento te ainda ta bao invstigacion. Claire lo permanece den nos curason pa semper y su ausencia ta laga un bashi cu lo ser senti pa tur esunnan cu ta stim’e.”

Lil Tay a logra haya fama viral ora cu e tabatin 9 aña di edad como influencer. E hobensita aki a bira conoci pa su videonan riba instagram unda e tabata mustra un bida cu hopi rikesa y cu ta releha un bida di hiphop. Den un di e videonan, el a comparti cu el a cumpra un vehiculo di 200,000 dollar apesar cu e no por a stuur. Den otro video, e tabata graba e bista di riba Beverly Hills unda el a describi “mi ta doño di L.A.” Lil Tay tabata asocia cu rappernan popular manera Chief Keef y XXXTentacion, ken el a yama “un figura paterno” den un publicacion di aña 2018 riba instagram. El a ricibi hopi critica pa su uso di palabranan ofensivo, y despues a pidi despensa na e personanan cu el a ofende.

Despues di a disparce di internet 5 aña atras, Lil Tay a pasa door di un bataya di custodia entre su mayornan, mientras acusacionnan sospechoso a aparece online tocante su situacion familiar y su siguridad. Den juni di aña 2018, tur cos a ser kita for di su instagram y e palabra “yudami” a keda publica riba su pagina.

Den un supuesto hack di algun luna despues, un serie di acusacionna di abuso a ser haci contra su tata, Christopher Hope. E acusacionnan a bisa cu Hope a pidi un ordo na Corte pa Lil Tay bolbe back Canada y asina e por tambe disfruta di e ganashi cu Lil Tay ta genera.

E fayecimento di Lil Tay y su ruman homber te ainda ta bao investigacion y no tin hopi informacion tocante esaki te ainda.