Ayera den medionan di comunicacion local a circula informacion cu Sra. Kathy Paskel, ex-director di Dimas, a haya instruccion di minister di Labor, Glenbert Croes pa transferi como hurista na Departamento di Asunto huridico (DWJZ) pa un periodo di seis luna.
Mei ultimo, mientras cu Paskel tabata cu vakantie, minister di Labor y Integracion Glenbert Croes a manda un carta dirigi na dje informando di un toegangsontzegging (aceso na e sistemanan di Dimas) y ademas Paskel tambe a haya e prohibicion di entrada na e departamento. E tempo ey a informa cu Paskel ta suspendi pa tres luna – mientras tabata haci un investigacion – y e funcion cu e tabata fungi a keda den man di Monique van Wilgen, ken ta 1e waarnemer. E tres luna lo a conclui na juli, pues awo ta mira cu toch no a debolb’e na su posicion original.
Pero esaki no tabata e prome biaha cu Paskel a keda suspendi di su funcion. Na maart di 2022 tambe a haya un carta di retiro di minister Croes, cu na e momento ey el a indica cu tabata “pa desconfiansa” y a crea un stuurgroep pa guia y informa trahadonan di e departamento aki pa loke tabata trata e maneho nobo di e minister na e momento ey. Sinembargo, na mei 2022 Hues a tuma decision den e caso cu Paskel a entama contra Croes, dictando cu e decision aki tabata uno contra ley. Hues a suspende e decision di e mandatario te ora cu e caso wordo trata den su profundidad, aunke gobierno no tin mucho chens di gana esaki [un bodemprocedure], mirando cu e decision tabata uno contra ley.
Portal online NoticiaCla a informa cu Paskel lo a manda un carta na e trahadornan di Dimas informando nan di e transferencia di su persona pa DWJZ. Den e carta el a splica tambe cu a traves di un decreto ministerial a impone un orden temporal cu duracion di seis luna pa su tareanan na DWJZ cuminsando dia 3 di augustus ultimo. Pues no ta permiti e pa reanuda su funcion como director di Dimas.
Bon Dia Aruba a tuma contacto cu minister Glenbert Croes, kende a confirma e noticia bisando cu Paskel lo tin e funcion den DWJZ pa seis luna.
