Asambeho School Roderich Lopez y Massive Brassband Internacional un biaha mas a representa Aruba ariba e tarima internacional cu nan ritmo contagioso di asambeho. E biaha aki nan tabata na Medellin, Colombia pa e Feria de las Flores.
Aña pasa e scol a representa Aruba na Orlando, Florida na Merca den Magic Kingdom cu pa prome biaha a scucha e ritmo di asambeho di Aruba. Un logro sumamenta grandi y importante pa e arte musical, pa e scol y pa Aruba.
E biaha aki e grupo a sali rumbo pa Colombia dia 3 di augustus pa presenta na Feria de las Flores na Medellin. Den un publicacion ariba e pagina oficial di Facebook di Asambeho School Roderich Lopez e scol a informa cu nan a presenta un total di 18 tema musical durante e Feria de las Flores na Medellin. Un combinacion di musica di Aruba y Colombia y mas y tur mas cu claro a wordo presenta ariba e ritmo di asambeho.
E presentacion di Asambeho School Roderich Lopez y Massive Brassband Internacional a causa sensacion hasta prome cu nan a sali oficialmente pa e desfile. Prome cu nan salida e grupo a haci un warm up ariba e cantica ‘back bone song’ cu ariba un video publica ariba nan pagina oficial di Facebook por a mira con e ritmo di asambeho tabata yena e cayanan di Medellin cu un ambiente y energia incomparabel.
E representacion di Asambeho School Roderich Lopez na Feria de las Flores ta ratifica e compromiso di e organisacion aki pa sigui engrandece e ritmo local di asambeho y laga Aruba su nomber resona internacionalmente.
