Cu hopi alegria, Cas Princesa Aruba ta anuncia cu su representante Jayleen Croes, a conkista, e weekend cu a pasa, e corona maximo di Miss Ambar Mundial 2023 na Punta Cana, Republica Dominicana.
Entre paisnan grandi di Hispano-America, manera Republica Dominicana, Haiti, Mexico, Chile y Puerto Rico, Miss Ambar Aruba 2023, a logra e corona maximo. Tawata un siman yena cu eventonan cultural y di beyesa na unda disciplina a hunga un rol hopi importante. Nos Miss Ambar Aruba, Jayleen Croes a sa di acudi na tur y conkista finalmente e corona maximo.
Fundacion Cas Princesa Aruba ta e organisacion responsabel pa e certamennan Princess Beauty, Little Beauty y Pre Teen Beauty di Aruba.
Cas Princesa, henter famia y amigonan ta felicita Model Cas Princesa Jacy Croes, Little Miss Beauty Thaheeli Geerman, Pre Teen Aruba, Maya Gordon y Miss Ambar Aruba, Jayleen Croes pa e tremendo presentacion poniendo Aruba su nomber na halto.
E luna cu ta bini, Cas Princesa ta habri inscripcion pa e certamen nacional di 2023.
