Reces di parlamento y vacacion – relativo – pa gobernacion ta un bon momento pa nos reflexiona con nos pais ta bayendo den sentido general. Por cuminza cu bisa cu den termino general e aña aki ta mustra un desaroyo economico fuerte, como continuacion di e recuperacion economico di 2021 y 2022. Cifranan positivo ta e aumento fuerte cu por nota den cantidad di empleo, manera registra pa SVb, cu entre 1 di augustus 2022 y 1 di augustus 2023 a mustra como 2.500 cupo di trabao mas, mientras cu casi 2.000 di e aumento a tuma lugar den e aña aki. Esaki ta mas o menos den linea cu e crecemento economico indica pa e aumento di turismo, tanto stay over como di crucero. Loke no ta conoci cuanto di e crecemento di e empleo aki ta di crecemento economico mes y cuanto di un eventual mehoracion di cumplimento di dunadornan di trabao, cu ta resulta den mihor cifra y ingreso pa SVb, y pa gobernacion.

Lo anterior no ta implica cu no tin aspecto menos positivo. Por ehemplo, tin un situacion di inflacion basta fuerte, cu e aña aki lo percura cu lo tin un aumento di GDP real di solamente 0,4%, banda di un GDP nominal cu segun Banco Central lo ta 8,6%. Segun e mesun entidad aki tin un situacion positivo di inversion, tanto di sector priva como publico, a pesar di e prijsnan eleva y incertidumbre di medidanan fiscal na caminda. Esaki lo tin un efecto negativo riba consumo real lo mustra un crecemento negativo den ambos sector, pa via di e presion inflacionario. Con esaki lo bay resuta e aña aki no ta conoci ainda, cu e medida di e BBO na frontera pa tuma efecto ainda den e lunanan venidero.

Nos no ta bay trata henter e perspectiva pa e aña aki en extenso, pasobra tin otro asunto pa contempla. Esey ta primeramente, den e temporada aki, e asuntonan cu no tin di haci directamente cu e situacion economico o e controversia cu Hulanda tocante supervision financiero, pero cu si ta exigi atencion di tanto gobierno como oposicion. Algun di nan ta aparece tambe den e reciente rapport di IMF.

Un di e puntonan strategico cu IMF a señala – atrobe – ta e politica encuanto nos fondo di pension general, cu otro aña lo mira e punto final di e actual programa di restraso den yega na edad di pension, ora yega na e requisito di mester tin 65 aña pa cuminza cobra AOV. Si no sucede nada den e proximo añanan, e fondo administra pa SVb ta cuminza topa cu deficit dentro di cinco pa seis aña y lo keda bashi na mitar di añanan 2030. Por ta cu tin hende cu ta opina cu nos por bien warda varios aña mas pa cuminza discuti e asunto aki. Nos kier djis mustra riba e situacion cu nos tabata aden den pasado, unda tambe advertencia a cuminza na tempo, pero terquedad gubernamental a impedi accion, te na e momento cu no tabatin awa pa laba y mester a aumenta edad di pension. Nos sa cu e actual gobierno lo no tin gana di toca e tema aki, ya cu no mucho tempo pasa a usa e asunto aki den campaña, cu promesa di baha edad di pension atrobe. Ta bira tempo pa, si no kier admiti eror, en todo caso cuminza na tempo cu atende e tema aki. Nos no ta bisa cu esey necesariamente lo mester tuma lugar den un dialogo social, ya cu e termino ey mes a keda politicamente contamina, no solamente pa e uso pa e contrincante politico den añanan reciente, sino tambe pa e fracaso di e dialogo organiza pa gobierno social-democrata como 20 aña pasa. Esaki no ta tarea di gobierno so, sino tambe pa tur forza politico, ademas di e entidadnan envolvi.

Otro tema cu ta digno di atencion urgente ta enseñanza. Nos ta yegando atrobe na inicio di un aña escolar nobo y nos no ta mira ningun cambio structural na caminda cu ta cuminza atende e problemanan grandi riba e tereno aki. No ta trata solamente di e asuntonan estrictamente di e sector mes, pero nos mester cuminza mira enseñanza for di e importancia economico cu e tin. Nos sa awor caba, entre otro for di loke IMF y nos entidadnan local ta trece dilanti ‘time and again’, cu den e proximo decada nos no ta bay conta cu crecemento economico fuerte. E aña aki caba e recuperacion economico lo a tuma lugar caba y nos ta bolbe na e crecemento modera di promer cu Covid. Nos ta bay depende hopi mas di forzanan interno pa haci nos economia mas productivo y resiliente, no a base di expansion, sino a base di hende mihor prepara den un enseñanza cu ta entrega e hendenan prepara cu nos mester. Den nos opinion tin dos punto di lanza: enseñanza primario y educacion profesional basico y mediano. Ta pesey tambe cu nos no por bay aumenta e pago di interes riba prestamo cu centenares di miyones den e proximo decada pa terquedad gubernamental, pasobra nos tin otro, y mihor, cos di haci cu e placa ey.

Nos ta aprecia cu gobierno algun aña pasa a reuni centenares di persona cu experiencia y vision pa yega na e Masterplan pa futuro. Ningun persona mester ta full di acuerdo cu cada silaba, pero ta bira tempo si pa sigui traha, y di un forma transparente. Nos no ta mira esey, ainda.