Grupo di residente di Seroe Colorado ta pidi balans entre bienestar y desaroyo

E residentenan di Seroe Colorado cu ta biba banda di e tereno erfpacht, na unda construccion di e hotel Secrets ta tumando luga, a tuma nota di e decision di Corte di 7 juli 2023, den cual hues a duna orden na e minister pa tuma un decision nobo riba e permiso di construccion, na unda mester tene cuenta cu e obhecionnan di e residentenan.

Mediante un comunicado di prensa, e grupo di residente local di Seroe Colorado kier bisa explicitamente cu nan no ta contra desaroyo den Seroe Colorado, pero nan ta pidi atencion pa un balans entre e bienestar di e habitantenan y e desaroyo, na unda ta evita confrontacion y nan por biba den harmonia den e mesun bario na unda e desaroyo aki ta tuma luga.

Segun e residentenan, lamentablemente e espacio den e bario ta limita, pues mester planea e desaroyo debidamente.

Ya caba ta experiencia molester y disturbio pasobra e residentenan ta bibando mescos cu nan ta biba riba un tereno grandi di construccion durante e trabaonan cu ta den ehecucion, cu repetidamente y sin aviso ta tumando luga (tambe parcialmente) durante fin di siman y den marduga (03.30 am), y na unda truck grandi di cement ta produci hopi desordo y zonido, particularmente pasobra e ta bay den combinacion y na mesun ora cu luz fel instala di tal forma cu durante oranan di anochi ta ilumina te penetra e casnan.

E grupo di residente local ta señala entre otro e situacion cu ta existente ya pa hopi aña den otro parti di e isla, esta na unda hotelnan grandi mester ta situa den tal forma planifica (entre otro a base di e plan di zonificacion “Sasaki Associates” di añanan ‘80), cu e casnan mas cerca mester ta situa riba distancia di minimalmente 300 meter, pero hopi biaha 400 meter, mientras cu na Seroe Colorado e hotel masivo ta planea riba solamente 25 meter di e parcelanan residencial. Esaki cu tur su consecuencianan negativo.

E habitantenan ta splica cu ta kere cu no por yega na un solucion door di solamente emplea huristanan, pero cu mester consulta expertonan di desaroyo independiente y experiencia.

Luna pasa, hues administrativo mr. De Haseth den un veredicto a indica cu gobierno mester atende cu obhecionnan di e habitantenan di Sero Colorado prome cu e proyecto di Three Rivers por continua. E grupo di habitante a entama casonan contra e proyecto, hayando un biaha ma rason di hues cu e hotel na Sero Colorado no ta cumpli cu tur exigencia di bienestar.

Mientras tanto, San Nicolas Business Association ta bezig cu un accion pa recauda firma den sosten di e proyecto, a pesar cu un accion di firma no ta conta riba decision di un hues.