Recientemente, Banco Central di Aruba a publica e resultadonan di su encuesta di confiansa di consumidor, den cual a destaca cu consumidor na Aruba ta mas pesimista.
Consumidor tabata mas pesimista, mirando cu e indice di confiansa di consumidor a cay cu 0,4 punto di indice te na 92,6 den e di segundo trimester di 2023 (Grafiek 1)[1].
Na final di e di segundo trimester, consumidor tabata principalmente preocupa cu (I) e situacion di negoshinan y di economia lo deteriora (Q2-2023: 61 porciento, Q1-2023: 51 porciento), (II) tin dificultad pa haya un trabao nobo (Q2-2023:51 porciento, Q1-2023: 44 porciento), y (III) e posicion financiero di gobierno lo empeora (Q2-2023: 44 porciento, Q1-2023: 43 porciento).
Ademas, 39 porciento di tur encuestado ta anticipa cu e situacion financiero di hogar lo empeora den e di segundo trimester di 2023, esta 9 punto di porcentahe mas compara cu e trimester anterior (Q1-2023: 30 porciento). Aproximadamente 93 porciento di tur encuestado a señala cu nan ta premira cu prijsnan lo ta mas halto den e proximo 6 lunanan (Q1-2023: 91 porciento).
Tanto e indice di e situacion actual como e indice di expectativa a cay, esta cu 0,9 punto di indice te na 93,0 y 0,7 punto di indice te na 92,7, respectivamente, den e di segundo trimester di 2023.
E cantidad di encuestado cu a raporta cu tuma un hipoteca no tabata adecua a crece te na 68 porciento (Q1-2023: 65 porciento). Pa locual ta haci un prestamo, 69 porciento di encuestado a indica cu esaki no tabata oportuno (Q1-2023: 68 porciento). Mientras e encuestado cu a señala cu compra di un auto no tabata conveniente, como tambe compra di un aparato grandi no ta adecua, a keda igual na 73 porciento y 56 porciento, respectivamente. Ademas, 56 porciento di encuestado a indica cu baymento cu vakantie no tabata factibel, (Q1-2023: 57 porciento).
Consecuentemente, e indice di habito di consumidor a crece marginal di 92,5 den e di promer trimester di 2022 te na 92,6 den e di segundo trimester di 2023.
E indice por varia entre 90 y 110. Entre 90 y 100, e indice ta mustra un situacion di pesimismo. Un indice di exactamente 100 ta indica cu consumidornan no ta ni optimista, tampoco pesimista, pero ta neutral den nan pensamento di desaroyo economico na Aruba. Entre 100 y 110, e indice ta mustra un situacion di optimismo den pensamento di consumidornan.
Tocante Banco Central di Aruba
E proposito principal di Banco Central di Aruba (BCA) ta pa contribui na stabilidad financiero y prosperidad economico di comunidad di Aruba. BCA ta logra e mision aki door di implementa un maneho monetario efectivo dirigi na mantene stabilidad di balor di e florin, promove e solides y integridad di e sistema financiero y yuda mantene un sistema di pago eficiente y confiabel.
Banda di su tareanan principal, BCA ta encarga cu emision di biyete di florin y moneda di florin y ta e bankero di gobierno. Ademas e ta regula e transaccionnan di pago cu exterior y ta administra e divisanan di Aruba y ta controla e uso di esaki.
Pa mas informacion tocante Banco Central di Aruba, por bishita su website www.cbaruba.org
