(AP) — Papa Francisco a bisa diadomingo cu su recuperacion for di su cirugia abdominal mas recien ta bayendo bon, y a insisti cu el a cancela discursonan durante su trip di cinco dia na Portugal no pasobra e tabata cansa of sinti malo, pero pa comunica miho cu hende jong.

A puntra Francisco tocante su salud mientras e tabata bay cas for di Lisbon, unda el a presidi riba e festival di Dia Mundial di Hubentud. Tabata su prome biahe desde cu el a keda hospitalisa na juni pa nuebe dia despues di un cirugia di ultimo momento pa repara un hernia abdominal y retira tehido di cicatriz intestinal.

E biahe, cu a yega durante un ola di calor cu temperaturanan di 40 grado C na Lisbon, tabata notorio pasobra e pontifice di 86 aña di edad a desvia asina frecuentemente for di su discurso, homilia y hasta oracionnan, cual usualmente ta prepara lunanan adelanta y cu evento y audiencianan specifico den mente.

Un di e desviacionnan mas notable tabata un oracion pa paz, cu Francisco mester a entrega den e monumento Portugues di Fatima, cual ta famoso precisamente pa motibo di su conexion di varios siglo cu exhortacionnan pa paz y conversion di Rusia despues di Prome Guera Mundial.

Mirando e guera di Rusia andando na Ucrania, un oracion pa paz di Papa na Fatima lo mester tabata un di e highlights di e bishita di Francisco, pero tambe potencialmente problematico mientras Vaticano ta purba di mantene relacionnan cu Moscu y Iglesia Ortodox Ruso, cual a sostene e invasion di e Kremlin.

Na lugar di pronuncia e oracion, Francisco a improvisa su discurso dilanti di e statua di Madonna y no a haci e oracion, recitando na lugar di esey un Ave Maria cu hendenan jong cu discapacidad. Despues, Vaticano a post parti di e oracion riba @Pontifex riba e plataforma X, anteriormente conoci como Twitter.

Contestando pakico, Francisco a insisti cu el a resa silenciosamente pa paz, pero no kier a duna ‘publicidad’ na un oracion publico.

“Mi a ora! Mi a ora! Mi a ora na e Madonna y mi a ora pa paz. Mi no a haci publicidad. Pero mi a ora. Y nos mester continuamente ripiti e oracion aki pa paz.”

Un oficial di Vaticano, papiando anonimo, a nota cu Francisco inicialmente tabata kier biaha na Fatima su so, cu apenas algun gendarmes pa un bishita priva, pero a bay di acuerdo pa un bishita completo. E oficial a rechasa cu tabatin consideracionnan eclesiastico-diplomatico den e decision di Francisco, sugeriendo cu e omision tabata parti di un intento pa separa e balor mistico-religioso di Fatima for di su historia Sovietico y di Prome Guera Mundial.

Francisco a bisa cu el a haci su otro discursonan mas cortico pasobra el a realisa cu hende jong “no tin hopi atencion” y cu e mester logra capta nan, no duna nan les cu discurso of homilia largo y complica. “Homilianan por ta tortura tin biaha,” el a bisa. “Bla, bla, bla.”

El a bisa cu e iglesia mester bin na un idea nobo di homilia cu ta “breve, y cu un mensahe claro y di amor.”

Den otro comentarionan, Francisco a afirma cu el a inclui Catoliconan LGBTQ+ den su exhortacion cu “todos, todos, todos” ta bon bini den Iglesia Catolico. E comentario a bira un sorto di motto pa Dia Mundial di Hubentud, reflehando su vision di un iglesia inclusivo, ricibiendo tur.
“Iglesia ta mama” el a bisa. “Cada un di nos ta haya Dios riba su propio caminda den Iglesia. Y Iglesia ta mama, ta guia cada un riba su caminda.”