(CuraçaoChronicle) – Durante e proceso sumario entre Curaçao Refinery Utilities (CRU) y Caribbean Petroleum Refinery (CPR), CPR su abogadonan a pidi corte pa cancela e debenan cu a acumula desde november di aña 2022.

CRU a indica na corte cu CPR tin un debe cu actualmente ta yega un suma di 8.2 miyon dollar. E 8.2 miyon dollar ta representa pagonan cu no a ser haci. Adicionalmente, CRU a indica cu CPR ta debe un suma di 500,000 dollar a causa di gastonan di un acuerdo di labor. Segun CRU, nan a ehecuta trabao adicional pa CPR y esaki mester ser compensa.

Pa loke ta trata tur e debenan, CPR su abogadonan a indica na corte cu tin varios motibo pa cancela e debe aki. E debe di 8.2 miyon cu a acumula a causa di falta di pago, manera abogado Shannon Terpstra a bisa, a nota for di comienso cu e tankinan no tabata den un estado adecua. Ademas, investigacionnan lidera pa Ethward Manual tambe a confirma e sospechonan menciona.

Ethward Manuel a investiga e facilidadnan na Bullenbaai, unda e conclusion tabata cu tanki 9106 no tabata apto pa warda e gasolin. Den un email, Manuel a splica cu tabatin tambe poco informacion tocante con a adapta e tanki pa e por ser usa. Manuel su investigacion tambe a conclui cu no a ehecuta un inspeccion certifica di parti di CRU unda cu a indica cu e tanki no ta apto. Por ultimo, Ethward Manuel tambe a señala cu el a mira cu e tanki en cuestion tabatin contaminacion aden cu por afecta e producto importa pa CPR.

Segun abogado Terpstra, cu a representa CPR, Ethward Manuel su inspeccion ta provee suficiente evidencia cu CRU no a logra cumpli cu e obligacionnan stipula den e acuerdo di huur cu CPR. “Esaki ta nifica cu CPR ta vulnerabel na varios riesgo significante manera situacionnan peligroso, contaminacion y leak den e tanki,” Terpstra a splica den corte civil. E punto principal den CPR su defensa tabata cu e prijs di huur tabata basa riba tankinan cu ta apto pa uso, y den e caso aki, e tankinan tabatin fayonan tecnico. Basa riba e fayonan tecnico di parti di CRU su banda, Terpstra a argumenta cu CPR no mester tin cu paga e 8.2 miyon.

Un tercer partido por paga CPR su debe? Den corte, tambe tabatin dialogo tocante si CRU por ricibi e pago di e debenan for di un tercer partido, cual no ta CPR. Basa riba regulacionnan di OFAC, abogadonan a indica cu e pago no por ser ricibi for di otro partido. Den e caso aki, CPR a propone pa Knob Trading SA paga e debenan, sinembargo CRU a nenga di acepta e pago for di e compania aki, citando acusacionnan cu nan ta traha cu companianan sanciona na Venezuela.

CPR su abogadonan a indica ta contra di ley pa no permiti otro partner paga e debe. Artikel 6:30 di BW ta indica cu otro partido por paga un debe, asina ta cu mester conclui cu CRU no kier acepta e pago. Knob Trading SA tambe a indica via un carta cu nan ta dispuesto pa paga e debe di CPR, sinembargo CRU no a responde na e carta aki. Segun abogadonan di CPR, den e caso aki mester conclui cu CRU no tin derecho di ricibi e pago pa e debenan.

Segun abogadonan di CRU, nan no por acepta e pago di Knob Trading SA, mirando cu colaboracion entre Knob y Refineria di Korsou (RdK) por causa cu RdK lo perde su licencia di OFAC.