Siman pasa, Forbes a publica un articulo den cual ta mustra con cantidad di e destinacionnan turistico mas popular na Europa a cuminsa haya problema pa sobre-turismo. Anteriormente, Bon Dia Aruba a publica riba e efectonan di cambio climatico riba e destinacionnan mas popular na Europa y ki advertencianan esaki ta representa pa Aruba. Den e edicion aki, ta aborda e tema di sobre-turismo y su consecuencianan.
Cansa pa escasez di vivienda, trafico, zonido, contaminacion y desperdicio, cantidad di destinacionnan popular na Europa ta cambiando nan campañanan turistico di ‘bin cerca nos’ pa strategianan anti-turismo di ‘please no bin’ – y algun di e medidanan pa descurasha bishitante ta severo, segun Forbes.
Literalmente invadi pa turista, un cantidad di e destinacionnan mas iconico a bira imposible pa biba pa e residentenan local y demasiado sobrepobla, insigur y incomodo pa e bishitantenan. E beyesa, serenidad y simplesa di cantidad di e destinacionnan mas bucolico y mas busca na Europa no por sobrevivi miyones di yegada anualmente.
A pesar cu esaki no a yega na e nivel di un problema oficial pa gobierno di Union Europeo, e debate riba con pa maneha desborsdamento di turista a cuminsa. Cantidadnan enorme di turista – antes e ‘golden goose’ pa e sitionan aki – ta precisamente e motibo di e critica actual.
“Sobre-turismo ya ta asina grave cu destinacionnan popular awo ta haciendo loke antes no por a pensa, y activamente ta purbando pa disuadi of blokea yegada,” segun The Guardian. “E lugarnan mas perfecto na mundo ta siendo converti den fondo pa selfie di nos turistanan. Turismo masivo ta convertiendo destinacionnan den lo opuesto cu nan tabata antes.”
Rond di e continente, pero specialmente entre e ciudad y pueblonan mas popular, residentenan local ta bisa cu nan no por tuma mas di e efectonan destructivo di sobre-turismo. Venecia, por ehemplo, ta asina abruma pa e cantidad di bishitante cu a introduci un tarifa di entrada variando di 3 pa 10 euro pa haya acceso na e ciudad y su islanan. Pa maneha e multitudnan, Grecia a implementa un sistema di interval di tempo pa bishitantenan na e Acropolis.
E multitudnan tampoco ta un treat pa e turistanan mes, atrapa den filanan largo djis pa subi caminda di tera, cumpra un bebida, drenta un restaurant of aborda un trein, avion of bus. Maraviyanan natural of traha pa hende, y hasta iglesianan, a ser monetisa.
“Turistanan ta wardando mas cu dos ora pa bishita e Acropolis na Athens,” AP a reporta recientemente. “Rijnan pa taxi na e stacion principal di trein na Roma ta mesun largo. Y asina hopi bishitante ta concentrando rond di St. Mark’s Square na Venecia, cu e multitudnan ta keda pega crusando brugnan – hasta den siman.”
Boskenan pristino, beach y pueblonan chikito tin biaha ta asina yen di hende cu e bishitantenan no tin alternativa sino sigui e direccion di e multitudnan. Museonan por ta asina yen cu mira un exhibicion popular ta rekeri pa haci un reservacion lunanan adelanta. Y hasta e ora ey, ta dificil pa mira y aprecia e arte pa motibo di e cantidad di hende rond di nan.
Organisacion Mundial di Turismo ta pronostica cu pa fin di e decadanan aki, e fluho di turista internacional ta bay surpasa un sorprendente dos biyon.
Gobiernonan local y nacional ta bao presion pa haya solucion pa e boom di turismo masivo y algun a cuminsa pone restriccionnan.
Amsterdam
Amsterdam a vota pa prohibi crucero di drenta su waf principal. Esaki ta yega despues di un accion mas amplio cual oficialnan di e ciudad ta yama un “campaña pa descurasha,” y cu entre otro medida, ta prohibi pa huma marihuana pafo den districto di red-light, mientras cu campañanan oficial digital y riba poster ta enfoca riba hombernan jong Britanico, curashando nan pa “keda leu.”
E medidanan, manera alcalde Femke Halsema a splica, tin intencion pa descurasha bishitantenan di tuma un “vakantie for di moral” y controla e fluho di turismo y interupcion cu nan ta trece na e bunita ciudad cu su arkitectura pinturesco, museonan incomparable, canalnan pacifico y tambe su districto red-light y e coffee shops cu ta bende marihuana.
Cu menos cu un miyon habitante, Amsterdam ta atrae mas cu un miyon turista averahe pa luna.
A pesar di e controversia rond di e prohibicion di crucero, gobierno a splica cu e barconan gigante den centro di e ciudad “no ta fit cu e tarea pa combati turismo masivo y no ta den linea cu e ambicionnan sostenible di e ciudad.”
Amsterdam, considera como un ciudad altamente tolerante y liberal, a bira segun Lonely Planet “cada bes mas regula den añanan recien.” Oficialnan a bisa cu no tin husgamento moral involucra den combati cantidadnan desproporcional di “hombernan edad 18 pa 34 cu ta bin solamente pa haci fiesta y usa nos ciudad como backdrop,” segun vocero Carina Noordervliet a bisa. “E campaña di descurashamento ta enfoca na un grupo di hende cu en general no ta contribui na e ciudad di un manera positivo.”
Aruba
Banco central a haci un estudio riba e retonan di sobre-turismo y cambio climatico den economianan turistico di islanan chikito, enfocando particularmente riba Aruba.
Resultadonan di e estudio ta indica cu Aruba ta un di e econmianan di isla chikito mas intenso y mas denso pa cu turismo den Caribe. Anualmente, e isla ta atrae un averahe di 17 bishitante per capita y mas cu 10mil bishitante pa kilometer cuadra cu mas cu 800 camber pa kilometer cuadra di linea costeño.
Ta calcula cu al menos 46 porciento di hogar ta den riesgo significanete y aumentando pa cambio climatico. E estudio ta sugeri cu sobre-turismo tin efectonan directo y indirecto riba economianan turistico di islanan chikito. Mientras cu ta logra beneficionan directo di turismo den termino corto a medio, e costo socio-ecologico y e efectonan di sobre-turismo ta ser experimenta den termino largo cu consecuencianan negativo pa generacionnan despues.
E estudio ta conclui cu transformacion y reformanan structural ta urgentemente necesario pa mitiga e costo acelera di sobre-turismo. Mester haci inversion y innovacion den politica nacional y su ehecucion, esaki ta inclui reformanan comprensivo di politica pa reforsa resiliencia macroeconomico contra shocknan economico. Ademas, ta di sumo importancia pa reforsa e capacidad institucional y gobernacion pa un turismo sostenible y inclusivo.
Y si Europa, como e destinacion mas popular na mundo, por sirbi como ehemplo, awo ta e miho momento pa cuminsa implementa cambio prome cu tur e atraccionnan di nos isla keda destrui.
