Parlamentario Marco Berlis (MEP): Mansur no kier negocia, e kier entrega!

Parlamentario lider di Accion 21 kier entrega Aruba na Hulanda ‘cueste lo que cueste’

Mi a tuma nota cu den e ultimo lunanan sr.Miguel Mansur ta menciona con Gobierno mester firma e RAft ‘cueste lo que cueste’, ya cu e no por compronde con Gobierno no kier spaar 30 miyon di florin na interes. Mansur ta usa e argumento cu RAft lo haci cu Aruba lo spaar 30 miyon anualmente pa 20 aña, cu ta 640 miyon florin, pasobra e RAft lo duna Aruba un interes di 3.4% en bes di Mercado cu ta 6%-8%. Tur esaki ta zona logico y ta berdad parcialmente. Cu Mansur apenas tin poco tempo bibando na Aruba y no ta conecta cu loke ta biba den pueblo ta obvio. Su interesnan ta mas aya di nos cultura, lucha y creencianan. P’esey Mansur nunca lo haci e esfuerso pa negocia; e ta prefera pa entrega!

Loke Mansur no ta conta pueblo

(1) Mansur ta gaña cu Aruba lo spaar cu RAft. Pronto Aruba lo mester cuminsa pa paga e debe di Hulanda, e 916 miyon florin mas e interes riba e debe cu na 3.4% (RAft) lo ta mas o menos 30 miyon florin of 60 miyon pa via di un interes di 6-8% sin e RAft. Aruba lo mester produci extra placa pa paga e debe aki mas e interes anual. Tur esaki lo mester cuminsa na 2024. Si Aruba mester paga 30 miyon of 60 miyon extra na interes, kiermen nos a spaar?? No!

(2) Mansur ta gaña cu lo tin extra placa pa inversion. Mansur ta bisa cu si bay pe RAft, lo paga 30 miyon menos y usa e otro 30 miyon cu a spaar pa inversion den e pais. Esaki ta un ilusion! Si Aruba ta pagando 250 miyon di interes como pais, con bo por tin extra placa pa inversion si na 2024 mester paga 281 miyon na interes? No ta subi Aruba su gastonan a subi? Kiermeen, Mansur ta papiando barbaridad y locura total.

(3) Mansur pro pa Hulanda silencia Parlamento. Cu e RAft, Hulanda ta kita poder di Parlamento riba e budgetrecht. Segun Mansur y Marisol ban firma e RAft aunke nos ta bay sacrifica Parlamento su poder. Kiermen Mansur y Marisol ta pro kita bos di pueblo y haci nos organo di mas halto un organo sin poder.

(4) Mansur ta contra negocia, y kier entrega. Nos por wak cu Mansur kier entrega tur loke Aruba a bin ta lucha pe pa 37 aña largo. Pero Mansur no por compronde pasobra e no a biba na Aruba y no tin amor pa nos patria. E kier entrega pa 30 miyon florin pa aña. Mansur no kier negocia miho terminonan pa nos pais manera nos fraccion a bin ta haci. E ta wak cu pa 30 miyon pa aña e ta dispuesto pa entrega Aruba su cabes riba un teblachi na Hulanda sin contradeci, sin propone otro solucion, sin brinda otro perspectiva y loke ta importante pa nos pais. Mas lihe Gobierno firma pa entrega Aruba ta miho, segun Marisol y Mansur.

Gobierno y fraccion MEP ta propone otro solucionnan y un caminda diferente

Gobierno y Fraccion MEP ta kere cu tin otro alternativanan. Pa motibo di esaki, Gobierno ta na mesa cu Hulanda pa discuti e otro aspectonan y principionan cu ta importante pa nos pais Aruba. Algun di e proposicionnan aki ta:

(1) Nos kier pa Hulanda duna nos un trato igual cu Corsou y Sint Maarten y duna nos kwijtschelding. Discriminacion y deficit democratico nunca por wordo tolera den Reino y pa niun pais di reino.

(2) Nos kier pa henter nos debe nacional wordo refinancia na 3.4%. Esaki si lo haci cu nos lo spaar miyones cu por wordo reinverti den nos economia. Nos kier spaar pueblo hopi mas cu 640 miyon florin.

(3) Nos kier un fecha final pa por sali di e Rijkswet den algun aña.

(4) Nos kier modifica e LAft, esta un landsverordening, cu suficiente ingrediente pa Hulanda por tin siguransa nos lo paga bek. E LAft a demostra den pasado cu ta cumpli cune. P’esey nos no ta wak e necesidad pa bin cu un RAft, sigur ora por wak esaki no a funciona ni pa Corsou ni pa Sint Maarten.

Mayoria di Parlamento ta contra RAft!

Den diferente ocasion ora cu Parlamento di Aruba a atende e topico di RAFT, e uniconan cu tabata pro publicamente tabata partido MAS y Accion 21. Awor nos tin dos Parlamentario independiente cu tabata contra RAft, AVP, MEP y Raiz ta contra e RAft manera cu e ta awo. Mi a tuma nota cu un Parlamentario cu stima su pais y kier lucha pa su pais ta yega automaticamente na e conclusion cu ta imposibel pa acepta e RAft manera cu e ta. Pa Mansur y Marisol e solucion ta simpel; entrega Aruba na Hulanda na prijs di baca flaco. Mansur, un politico cu a expresa den pasado caba cu e lo kita 1.500 ambtenaar di trabao, kita overtime di polis, insulta pueblo cu ta opone su ideanan bisando cu nan mester cera nan boca y funda nan mesun partido, y cu e kier deporta stranheronan religioso pasobra nan ta contra su ley di mesun sexo. Miguel no kier negocia, e kier entrega!