(AP) – Turistanan na un hotel banda di lama na e isla Griego di Rhodes mester piki tur nan cosnan banda di pool mientras e candela tabata yegando mas cerca, coriendo pa yuda e empleadonan y localnan paga un di e candelanan di mondi cu tabata menasa e localnan durante olanan di calor recien.
E esfuerso di ekipo ta nifica cu “pa ora cu departamento di bombero a yega, ya caba a lidia cu mayoria di e candela,” Elena Korosteleva di Britania a splica, ken tabata na e hotel Lindos Memories di vakantie. E siguiente mainta, algun di e turistanan a corta nan vakantie sinembargo mayoria a keda pa motibo cu e hotel no a sufri daño.
E isla aki conoci pa su lamanan y sitionan anciano ta curando su heridanan despues di 11 dia di candelanan di mondi severo den juli. Despues cu miles di persona a ser evacua durante e temporada mas halto di biahe, Rhodes ta poniendo den balans con e crisis lo afecta su sector vital di turismo, cual ta wanta un gran parti di su economia y mas o menos 20% di Grecia en general.
Esaki ta conta pa otro destinonan manera Italia y Spaña, unda turismo tambe ta ricibiendo golpi di olanan di calor y candelanan di mondi. Grecia, Italia, Algeria y Tunisia combina a perde mas di 1350 kilometer cuadra den candelanan cu a afecta mas o menos 120,000 persona den juli segun calculacionnan di Union Europeo. Y Grecia ta premira cu lo tin mas calor extremo den e dianan binidero.
E alcalde di Villardeciervos, un parti di Spaña cu a ricibi golpi di candelanan den e temporada anterior a bisa cu te ainda nan ta ricibi turista pa bay hike.
“Turismo lo sufri un poco den e proximo añanan, sea cu nos gusta of no,” Rosa Maria Lopez a expresa. “Riba e rutanan di hike no tin mata mas y e ta hopi tristo pa mira. Pero e area aki te ainda ta sumamente valioso pa e turistanan apesar di tur cos. Nos lo mester adapta.”
Candelanan a causa cu varios turista no kier a bay partinan cu a ricibi golpi fuerte na Grecia y Italia. Rhodes a mira cancelacion en masse di vuelonan y e moda ta similar na Sicily, segun Olivier Ponti, Vice Presidente di ForwardKeys, un compania di dato di biahe cu tin acceso na data di pasashi den e industria di avion.
Aunke biahe pa Grecia en general no a ricibi golpi hopi fuerte, Italia no tabatin e mesun suerte. E candelanan aki “a causa un disminucion den reservacion pa varios destino Italiano, hasta na e luganan cu no ta cerca di e candelanan.”
Algun di e personanan cu tabata na e isla riba vakantie a bisa cu e candelanan aki mester motiva accion contra cambio di clima. “Esaki mester conscientisa nos tocante loke nos a causa na e planeta, cu e cambio aki posiblemente no lo tin solucion. Awo e no ta di turismo so. Mi ta kere esaki ta claramente trata con nos mester cuminsa tuma accion awo.”
