Kibrahacha Summer Camp a clausura cu entrega di certificado na su participantenan

Ayera a tuma e clausura di e Summer Camp pa adultonan mayor di Club Kibrahacha 60+. Lucia Hoek, coordinadora di actividad Club Kibrahacha 60+, a elabora un poco mas ariba e camp y e actividadnan cu e adultonan mayor a realisa durante e cuater simannan di e camp.

Hoek a splica cu mescos cu scol ta cera ta vakantie grandi, Club Kibrahacha tambe ta cera pa motibo cu hopi di nan boluntarionan ta bay cu vakantie y e club ta draai mas tanto ariba boluntario. Tin algun miembro cu si kier a sigui asisti na Club Kibrahacha durante vakantie y pues e club a habri un summer camp di cuater siman pa e adultonan aki.

E camp a cuminsa dia 10 di juli y a termina ayera 4 di augustus cu entrega di certificado, regalito hunto cu un lunch.

Hoek a conta cu durante e summer camp e adultonan mayor a haci diferente actividad. “Nos a bay core den bus rond, cual e adultonan mayor ta gusta masha hopi mes, nos a bay bishita Sero di Noka, Bubali Plas, Sero Crystal, Natural Bridge y tambe na Club Kibrahacha mes nos a haci diferente actividad. Nos a pinta cas di paharito, nos a pinta riba canvas, nos a haci un cahita sorpresa cual nan ta habri y nan ta haya diferente producto den dje y esey nan tin cu traha algo di come cune. Esey a bay super bunita, super bon,” el a indica.

El a agrega cu nan tabatin hersen gymnastiek, cual nan ta yama Kibra Cabes. Nan tabatin tambe scavenger hunt den cura di e club mes cual nan a yama ‘Ban cana y busca y piki’. Pa esaki e participantenan mester a cana rond y nan mester a busca diferente tipo di mata, tapadera y nan a haya informacion tambe mas amplio di e matanan cu tin den e cura di club mes.

“Nos ta super contento con el a bay. No tabatin un cantidad grandi di miembro, pasobra hopi no tin transport. Nos a hacie cu loke nos a haya y pa otro aña nos tin hopi mas plan pasobra tur e leidsternan di e aña aki, ta leidsternan di prome aña, dus aworaki nos tin mas idea pa algo hopi mas grandi,” Hoek a remarca.

Dia 14 di augustus Club Kibrahacha ta habri su portanan back y tur miembro regular lo bin back, pero tambe Hoek a haci invitacion na pueblo. “Si bo tin un bisiña, mama, tata, ruman, un hende cu bo conoce cu tambe ta 60+, e por pasa na e club pa busca informacion,” el a finalisa.

Minister di Transport, Integridad, Naturalesa y Asuntonan di Adulto Mayor, Ursell Arends, tabata presenta na e clausura di e summer camp pa haci entrega di e certificadonan na e participantenan. “Un summer camp cu adultonan mayor por a participa durante e periodo aki. Mi ta kere di e forma aki Kibrahacha ta sigui tene nos adultonan mayor activo y mi ta spera cu mas y mas adulto mayor por participa tambe,” Minister Arends a indica.

El a remarca cu esaki ta un forma cu cual por combati soledad cu hopi biaha e adultonan mayor ta enfrenta ora cu nan keda nan so na cas y di e forma aki tambe e adultonan mayor ta interactua cu otro persona y asina ta tene nan activo socialmente.

“Esey ta loke Kibrahacha a bin ta haci pa añas caba. Di parti di Gobierno y sobretodo di Ministerio di Asuntonan di Adulto Mayor nos ta sigui duna sosten y engrandece y fortifica e servicio cu Kibrahacha ta brinda,” el a remarca.

Un obstaculo cu Hoek a menciona ta e problema di transport. Tcoante esaki Minister Arends a indica cu ora cu ta papia di e tema di mobilidad, e ta un tema cardinal y dentro di poco gobierno ta bay atende cu esaki tambe.

Pa loke ta trata e tema aki el a splica cu gobierno ta bay atende cu un foro nacional pa asina hunto por yega na miho palabracionnan concreto di con ta bay atende cu e accesibilidad di e adultonan mayor pa nan por yega na mas organisacionnan cu nan por sinti nan mes activo, y mas cu tur cos,sinti nan mes aprecia den e comunidad.

“Esaki ta un tema cardinal, nos a cuminsa haci algun cambio caba, pero ta keda e obstaculo di transporte y esaki nos ta bay atende cune si,” Minister Arends a resalta.

Kedando den e mesun tema y contestando otro pregunta di prensa pa loke ta trata adultonan mayor cu ta biba na San Nicolas, cu hopi biaha ta sinti cu ta wordo neglisha, Minister Arends a splica cu busnan ta sali diariamente for di Kibrahacha pa busca adultonan mayor full rond di Aruba pa asina nan por yega na e club.

El a resalta cu e Ministerio di Asuntonan di Adulto Mayor ta constantemente den comunicacion cu Kibrahacha pa wak con nan por sigui yuda pa mas adulto mayor wordo busca full rond di Aruba. “Mi ta kere no solamente Kibrahacha, pero tambe Arubus tambe por participa grandemente pa asina yuda nos combati e falta di mobilidad cu ta existi na e momentonan aki den nos comunidad,” el a finalisa.