Emily-anne Andrews, Miss Teen Aruba International 2023: “Na final e tabata un experiencia bunita cu mi sa cu mi a duna tur di mi banda p’e”

Dia 22 di juli a tuma luga e certamen Miss Teen Aruba International 2023. Durante e anochi aki, e hobencita Emily-anne Aishme Andrews, cu awe 4 di augustus ta cumpli 18 aña di edad, a keda corona como e embahadora di beyesa hubenil di Aruba.

Den un entrevista cu Bon Dia Aruba, Emily-anne ta conta di su mes, su experiencia den e certamen y kico el a siña durante e temporada di diferente actividad-, seminario- y tayernan cu e candidatanan a ricibi prome cu e gran anochi final.

Actualmente Emily-anne ta studiando na EPB San Nicolas y esaki lo ta su ultimo aña, examen klas, sector economie. E ta describi su mes como un persona hopi social y carismatico cu gusta bay lama, baila canta y cu gusta e mundo di moda, pero prome cu tur cos Emily-anne gusta pasa tempo cu su famia.

Su participacion den e certamen a bira realidad danki su mama, ken ta e persona cu a motivele pa participa. “E persona cu a motiva mi pa drenta Miss Teen Aruba International ta mi mama. E la puntra mi si mi ta interesa pa drenta Miss Teen Aruba Internacional y awor danki na su pregunta mi a logra gana e corona y mi ta Miss Teen Aruba International 2023,” el a conta.

Esaki ta algo completamente nobo pa Emily-anne, nunca e no a participa den un certamen di beyesa anteriormente. “Un experiencia unico y inolvidabel,” el a remarca.

Pa loke ta su preparacion, el a conta cu e tabata un experiencia hopi bunita cu dia y anochinan largo pero cu hopi entusiasmo. “Na final e tabata un experiencia bunita cu mi sa cu mi a duna tur di mi banda p’e,” el a indica.

Su experiencia durante e certamen, Emily-anne a sigui conta, tabata algo hopi bunita y un momento unico y inolvidabel. Loke el a gusta di e certamen ta cu no solamente e candidatanan ta siña di un concurso di beyesa, sino cu tambe nan ta siña conoce nan mes y siña di nan mes.

Danki na su bunita experiencia cu Miss Teen Aruba Internacional, Emily-anne lo recomenda otro hobennan pa participa den e certamen, cu no ta solamente un certamen di beyesa, pero ta hopi mas cu esey.“Si mi lo recomenda un otro hoben pa participa den e concurso aki, como cu e lo yuda e hoben no simplemente den beyesa y moda so, pero tambe bo mes como un persona,” el a enaftisa.

Por ultimo Emily-anne su mensahe pa hobennan di Aruba: “Mi mensahe como embahadora di beyesa ta; tur loke bo kier ta bo ta caba bo simplemente ta riba e caminda pa descubri loke bo kier bira.”