E siman aki, Bon Dia Aruba a tene un entrevista cu Gunnar Bracelly, fundador di Petros Aquaculture Operations VBA, cu recientemente a hala atencion pa nan plan pa introduci un criadero di pisca den lama habri di Aruba.

Bracelly a cuminsa conta cu e ta considera su mes un ambientalista, e ta stima lama y bida marino, ta duik y ta pisca. “Sigur mi no kier trece algo pa nos pais cu ta bay [tin impacto] negativo riba nos naturalesa. Pues mi tin tur e boxnan cu mi cu check pa mi sigura cu no ta bay contamina. Tin asina tanto white papers cu ta mustra pakico open-ocean aquaculture ta nos futuro pa loke ta aquacultura mundial,” el a bisa.

Segun The Guardian den su articulo titula “Offshore fish farms: a new wave of food production … or the ‘wild west’ of ocean pollution?”, tin e posibilidad cu e criaderonan riba lama habri por alivia presion riba poblacionnan di pisca salvahe. “Na 1974, como 10% di stock di pisca den lama mundial tabata siendo extermina demasiado rapidamente pa e especienan por a reemplasa nan mes, segun Organisacion di Nacionnan Uni pa Cuminda y Agricultura, Pa 2017, e proporcion aki a aumenta na 34%. Ta mira e ubicacion den lama habri como algo positivo, pasobra e corientenan mas fuerte por dilui desperdicio y evita e degradacion di costa cu hopi biaha ta mira den e criaderonan ubica den bahianan y estuarionan.” Sinembargo, segun The Guardian, “e atractivo ta e promesa di produccion di pisca sostenible.”

Igualmente, National Geographic a publica su articulo titula “What is aquaculture? It may be the solution to overfishing.” Den esaki, ta bisa cu aquacultura “ta e industria pa produccion di proteina creciendo mas rapidamente,” agregando cu “mas cu 50 porciento di cuminda di lama na mundo ta bin di aquacultura.”

Den e articulo, Daniel Benetti, director di aquacultura na Universidad di Miami, ta comenta cu “e debate a caba. [Aquacultura] t’ey pa keda.” Mientras sobrepesca ta menasa awanan mundial y e especienan cu ta depende riba esaki, aquacultura por ta e solucion pa tene piscadonan na lama y cuminda riba mesa, segun National Geographic.

Benetti a bisa cu un criadero offshore ta cualkier criadero estableci den awanan profundo. Esaki ta e forma di aquacultura mas intensivo pa labor – cual ta parti di e motibo cu tin solo un na Merca, na Hawaii, cual ta Blue Ocean. Nan tambe ta rekeri procesonan innovativo pa traha: criadornan ta usa haulanan rondo cu ta parce balanan flotante di pisca den net.

Claro cu e preocupacionnan pa medio ambiente no ta sin base, y Bracelly ta reconoce esaki. E ta bisa por ehemplo na Noruega, unda tin aquacultura den e fjords, “nan ta buta tur e haulanan den e bahianan, no tin hopi stroming, tur e desperdicio di e piscanan ta colecta bao di e net, bo ta haya bo cu parasito.” Igualmente, qz.com ta reconoce cu “criadero di pisca tin yen problema, desde haulanan sobrepobla te uso di antibiotica y cuminda geneticamente modifica. Pero den ocean, tin mas espacio pa e piscanan separa y e contaminantenan disolve. Y criadero industrial offshore tambe ta duna e cantidad di pisca salvahe un chens pa recupera.”

Ta p’esey Bracelly ta bisa cu e tin 15 aña studiando open-ocean aquaculture. For di 2007 a cuminsa cu SeaStation, prome cu InnovaSea a cumpra nan, “pero pa mi, e temporada ey e tecnologia no tabata avansa suficiente. E tabatin su potencial, pero e no tabata cla,” Bracelly a splica. Sinembargo, e ta bisa cu semper e ta kere cu mester produci algo. “Produciendo algo na un isla ta masha dificil. Nos tin aworaki ongeveer 70 miya cuadra di superficie. Si bo coy 12 miya cuadra di awa teritorial, nos tin casi 400 miya cuadra di lama teritorial. Ya nos no ta bezig ta cultiv’e, of purba di pon’e traha pa nos pais manera nos ta ‘slice and dice’ e delaster pida chikito [riba tera.]”

Bon Dia Aruba a nota sinembargo cu e awa teritorial di Aruba, parti ta cay den e Zona Economico Exclusivo (EEZ), cual ta maneha pa Hulanda. Pero segun Bracelly, “nos no tabata kier a bay den e EEZ.” E EEZ ta entre e islanan di Caribe y ta pafo di 12 miya nautico, mientras dentro di e 12 miya nautico aki ainda ta teritorio di Aruba. Bracelly ta enfatisa cu e intencion ta pa desaroya e teritorio cu ta di Aruba.

“Ora bo bini back riba un aquacultura riba su mes, anto bo mira tur e blue ocean cu tin eyfo, bo ta papia di Blue Economy y tur locual ta biniendo. Nos ta bay yega 9 biyon hende pa aña 2050 ongeveer, mester di mas proteina. Mundo no por keda cria baca di e manera cu nos ta criando baca of porco. No tin suficiente, y tur esaki ta 2D. Pero ora bo pensa Blue Economy, offshore aquaculture, bo no mester di e mesun oppervlakte, pasobra bo ta den 3D. Bo ta creando ta proteina den un punto di bista 3D, esaki kiermen cu nos por escala.”

Bracelly ta señala cu mirando mas leu di nos frontera terestre, ainda tin un teritorio cu ta hasta 7 biaha mas grandi cu por usa pa mehora nos seguridad di cuminda, diversifica economia, bin cu un industria nobo, y crea cupo di trabao pa expertonan den bida di lama. E ta enfatisa cu mester ta un negoshi sostenible.

Otro preocupacion pa cu medio ambiente ta e posibilidad cu e piscanan cu ta cria por tin un impacto riba e poblacionnan di pisca endemico. Bracelly a splica cu esey ta e motibo cu a scoge e Red Snapper, cual ta un especie endemico na Aruba, y e ta enfatisa cu e idea ta pa bin cu pisca organico, pues si e piscanan ta sali huy for di e criadero, y nan broei cu e poblacion local, esaki no lo tin en principio un impacto negativo. Ademas a scoge un pisca di awa cayente cu lo ta mas resiliente pa cambio climatico. Igualmente, e pisca aki ta un “schooling fish” cu semper ta hunto, pues tambe ta ideal pa ta den un haula.

Tambe el a splica cu e SeaStations di InnovaSea, cual ta nan proveedor, ta usa tecnologianan hopi avansa. A haci estudio cu ta mustra cu animalnan no ta keda atrapa den e wairanan pasobra “den e tecnologia aki e cabuyanan ta strak, mester tin tension pasobra bo no kier pa e zwaai bay bin.” Tin sensornan di stress riba tur e sistema, no tin net cu ta flota den awa. E net ta traha di un material special pa no tin crecemento riba dje cu lo por trece parasito cu lo stress e pisca y baha e calidad.

Igualmente, e tecnologia ta yuda monitoria e bienestar di e pisca, cual Bracelly ta bisa ta importante pa sigura e calidad di e producto puramente desde e punto di bista di negoshi. “Mas contento e pisca ta, miho e ta. P’esey tin e coriente di Caribe cu ta sali for di Brazil, pasa door di Trinidad, islanan ABC despues bay golfo di Mexico, e coriente ey ta trece hopi oxigeno. Nos a haci hopi test caba cu ta mustra cu esey ta bon pa e pisca.”

Bracelly ta splica cu e tecnologia cu ta usa tambe ta monitor cuanto cuminda e pisca ta consumi pa asina por sigura cu no ta duna di mas, y na ki momento mester duna nan cuminda tambe, asina evitando contaminacion innecesario. Y pa loke ta trata e cuminda mes cu ta duna e pisca, ta busca cuminda di calidad cu ta specifico pa e especie, y por mira precies kico tin den e cuminda, y si a cultiva esaki sosteniblemente.

Tambe ta monitor e manera con e pisca ta landa pa check si e ta sinti bon, si e tin stress prome cu e pisca bira malo.

“Haci di e forma corecto, criadero den lama habri ta asina positivo,” segun Bracelly.

Potretnan di InnovaSea.