(AP) —Colombia y e Ehercito di Liberacion Nacional (ELN) a cuminsa un periodo di bahamento di arma di seis luna cuminsando diahuebs como parti di un proceso pa crea paz permanente entre e gobierno y e ultimo grupo rebelde den e pais.
E acuerdo di baha arma, anuncia dia 9 di juni durante discusionnan na Havana, ta bin den un tempo unda e Colombianonan ta duda cu e proceso di paz por trece un fin na e insureccion andante desde añanan 1960 of para e envolvimento di e 5.000 miembro di e grupo rebelde den narcotraficacion. E liderazgo di ELN ta nenga nan envolvimento den e comercio di droga.
E acuerdo tambe a yama pa e creacion di un comision nacional representativo pa discuti un solucion duradero. E prome reunion di e Comision di Participacion Nacional a tuma luga ayera. E bahamento di arma mester suspende atakenan entre e guerrillanan y e cuerpo policial y ehercito Colombiano den henter e pais, y por ser extende pa januari otro aña si tin progreso den e negociacion di paz.
Luna pasa a tira culpa riba e guerrillanan pa e asesinato di tres agente policial riba frontera cu Venezuela, e secuestramento di un sargento militar y su yiunan, y varios incidente di explotacion. Nacion Uni a anuncia diaranson cu el lo desplega un grupo di 68 observador pa monitoria e bahamento di arma. Farhan Haq, un vocero pa Secretaria-General di NU, António Guterres, a bisa ayera cu e esfuersonan di paz na Colombia “ta avansando.”
Presidente Gustavo Petro, ken a tuma oficina como e pais su prome lider iskierdista, a duna momentum nobo na e esfuersonan di paz den e pais, y el a logra e acuerdo recien cu comandante guerrilla Antonio García durante e discusionnan den e capital Cubano na juni.
Petro a pusha pa loke ta yama un “paz total” cu lo demobilisa tur e gruponan rebelde cu a resta den e pais tambe como gangnan di narcotraficacion. El a cuestiona si lidernan mayor di ELN tin ful control di un generacion mas jong di comandantenan cu segun e ta mas enfoca riba e comercio ilegal di droga cu riba metanan politico.
Dos fraccion di ELN—e Frente Nacional di Guera Urbano y e Frenta di Guera di Norte—a anuncia nan aprobacion di e bahamento di arma net prome cu esaki a bay den efecto, bisando cu nan lo cumpli cu e ordennan di comandante García pa cumpli cu e terminonan di e bahamento di arma.
Sinembargo, e lider di ELN a adverti cu e grupo ta keda cu e derecho pa bringa si nan ser ataca. ELN a ser funda den añanan 1960 pa lidernan di sindicato, studiantenan y pastoornan inspira pa e revolucion Cubano. Ta conoci cu tabata hopi dificil pa gobiernonan Colombiano den pasado purba negocia cu nan.
Na 2016, gobierno Colombiano a firma un acuerdo di paz cu e grupo FARC cu a trece un fin na 5 decada di conflicto den cual aproximadamente 260.000 hende a muri. Pero violencia a sigui afecta hendenan bibando den partinan rural di e pais, unda ELN ta activo, hunto cu gruponan di FARC y gangnan di narcotraficacion.
