Den nos edicionnan anterior, Bon Dia Aruba a trece informacion tocante e proyecto di compania local Petros Aquaculture Operations VBA, cu usando tecnologia di InnovaSea, tin plan pa bin cu un criadero di pisca riba lama habri. Ayera tardi, Bon Dia Aruba a combersa cu Gunner Bracelly, ken ta e fundador di Petros Aquaculture, y a ricibi mas informacion, como tambe aclaracion, riba e proyecto aki.
Bracelly ta enfatisa cu e ta un persona hopi habri cu ta prefera di ta transparente den su negoshi, pues e kier a tuma e tempo pa trece claridad pa tur e duda cu a bin tocante su negoshi. “Mi no ta un politico, ami a studia ingenieria. Mi gusta hechos, ciencia, of e ta of e no ta.”
Pa cuminsa, Bracelly a aborda e comentario di minister di Naturalesa, Ursell Arends, kende a bisa cu no a pidi ni permiso ni onheffing pa e proyecto aki. “Nos ta bon na altura cu tin hopi permiso cu bo mester haya prome cu bo yega na realisacion di un proyecto asina’ki. Ta p’esey tur e contesta cu boso a haya for di minister Arends ta corecto, pasobra nos no a pidi un permiso, nos no a yega eynan ainda.” Bracelly a splica cu e proyecto no a yega dje leu pa pidi ontheffing of permiso.
Bracelly a splica tambe cu e motibo pakico e press release di Innovasea a bay pa prensa internacional, ta pa motibo cu actualmente e compania ta buscando inversionista internacional pa realisa e proyecto, y como cu nan tin bon relacion cu Innovasea, a dicidi di manda un press release pa hala atencion di potencial inversionista internacional. “Innovasea riba su mes no ta un inversionista den e proyecto. Nan no ta un partner den e sentido cu nan ta bay ta parti di e operacion,” Bracelly a splica. “Innovasea ta un compania cu ta bende tecnologia.”
E “aprobacion” di gobierno cu ta menciona den e press release di Innovasea, ta referi na e permiso pa registra nan negoshi pa bin cu e tipo di desaroyo cu ta nan intencion, pues un “business licence.”
“Prome cu nos a funda Petros Aquaculture Operations VBA, via di DEAZI, nos tabata kier sa si tin un angulo pa bin cu un proyecto asina di berdad. Y team di DEAZI no ta otorga permiso pa un compania establece su mes – vooral ora ami y mi casa nos dos ta bibando pafo di Merca – pues tabatin un lista larguisimo (di rekisito,)” Bracelly a splica. “Mester proba cu en berdad ta esey bo ta bay haci, cu no ta un ‘shell company’ cu ta trahando bao un nomber cu tur hende haya leuk anto eventualmente bo ta bay haci algo otro.” Tambe mester a pasa via Banco Central, y esey ta e parti di aprobacion cu nan ta referi na dje, pues e “licensing,” ya cu na Aruba no por djis yega establece cualkier cos. “Prome cu nos yega [na pidi permiso], nos kier a sigura cu tin un posibilidad pa haci e proyecto aki di e manera segun nos vision.”
Bracelly a splica cu e y su casa, Iselle Dañe, a usa su propio fondonan personal pa paga pa haci un estudio. “Ora Innovasea haci un estudio asina, nan ta bay riba data di NASA, di NOAA, tur e data pa nan por wak unda coriente di lama ta pasa, kico historicamente e haltura di ola ta, con hopi biento tin, con hopi stroom na 0m, 20m, na tur e profundidad,” Bracelly a conta. “Tur esaki nan mester a haci prome pa wak si tin un aeropuerto con leu bo tin cu hiba bo trahadornan – esey ta cay bao ley laboral; tur esey nan a yuda cune prome cu ami cu mi casa a bisa, ‘bo sa kico, esaki ta real.’” Asina nan a dicidi pa sigui cu nan soño pa establece e compania cu awo yama Petros. El a conta cu e tin 15 aña ta studiando loke ta open-ocean aquaculture, pues tin hopi tempo ta bin conceptualisando e idea.
Bon Dia Aruba a puntra tambe tocante e director cu ta aparece pa Petros Aquaculture Operations VBA den su registro na KvK, cual ta Ramiros Meatproducts VBA, un productor di sanger yena.
“Boso tabatin e pregunta ken ta e persona natural tras di e compania, esey ta Iselle Dañe, mi casa. E ta naci na Aruba.” Pero nan ambos tin hopi aña ta biba na Merca. “Mi casa ta naci na Aruba, e ta e majority owner, pero bo mester un hende local, maske bo tin un Rubiano cu ta majority owner, pasobra nos no ta biba na Aruba. Bo mester un director local. Anto na Ramiros Meatproducts, Ramiro ta e director. Ora nos a bin geef aan cu ta Ramiro ta e director pa Petros, notario a bisa cu si ta e mesun director, pa hacie mas simpel pa DEAZI haci tur e licencia pa haci e negoshi en general segun ley di Aruba – atrobe, no permiso pa produccion, no ontheffing, sino e business license – el a bisa cu por usa Ramiros Meatproducts como e director, y di su mes e directorado ta keda mescos, pasobra esey lo tabata mas facil. Pasobra si bay usa otro hende lo tin cu paga abogadonan y ta bira mas complica.” Pero si Bracelly ta aclaria cu Ramiros Meatproducts no ta inversionista ni partner den e proyecto.
Ademas, Bracelly a splica cu el a obtene su licencia di director tambe, “pero ainda nos no a haci e cambio na KvK.” Sinembargo e ta enfatisa cu DEAZI a haci un background check riguroso, y cu awo cu e mes tin su licencia, “Ramiros Meatproducts no tin nada di haci.”
El a bisa cu e ta compronde cu e manera con e registro ta actualmente na KvK por causa confusion, ya cu ta algo cu tambe e mester a splica na su inversionistanan. “E compania ta Iselle Dañe ta e majority owner, anto ami ta bira e di dos, y esey t’e.”
Esaki mientras cu ta defini ki rol e potencial inversionistanan por tin. “Depende den ki capacidad e inversionistanan ta bin; naturalmente si ta un inversionista cu no a inverti na Aruba, e lo tin cu pasa den henter e background check na Banco Central prome cu e fondonan por drenta Aruba. Tur esaki nos ta na altura di dje. El a splica cu cualkier inversionista lo mester haya su propio licencia na Banco Central prome cu kier hinca e placa, si ta inversionista priva, si ta institutonan, si ta banco, nan tin cu pasa den un proceso.
Sinembargo, Bracelly ta enfatisa cu “nos no ta asina leu ainda… nos ta yegando mas cerca si cada dia si.”
Den nos siguiente edicion, Bon Dia Aruba lo elabora mas riba e contestanan di Bracelly pa loke ta e impacto ambiental cu e proyecto potencialmente por tin, como tambe algun detaye di e tecnologia cu tin pensa di usa pa e proyecto.
