Luna Foundation ta un fundacion hopi conoci den comunidad pa e bunita trabao cu nan ta haci pa yuda cachonan cu ta wordo maltrata y esnan riba caya. Recientemente e fundacion a lansa un kalender di cumpleaño, ‘Birthday Calendar’, pa recauda fondo pa yuda e fundacion sigui eherce nan trabao y yuda e bestianan cu tin mester di dje.

A pesar cu enfoke inicial di e fundacion tabata pa rescata cachonan maltrata solamente, nan expande y aworaki Luna’s Safe Haven, e santuario di e fundacion, tin diferente otro bestia cu a pasa den trauma, mascotanan cu a wordo maltrata y Luna Foundation ta rescata nan pa yuda nan mehora, rehabilita pa asina despues nan por haya un hogar cu lo duna nan amor y e cuido necesario.

E ‘Birthday Calendar’ di Luna Foundation ta un kalender cu tin potret di personahenan Arubiano conoci cu ta apoya y sostene e trabao cu e fundacion ta haci y di boluntarionan di Luna Foundation mes cu ta sali hunto cu e streanan principal di e fundacion, e cachonan.

E fundacion a dicidi di bin cu un ‘Birthday Calendar’ pasobra e ta algo diferente cu no ta hopi conoci na Aruba y e ta un kalender cu no ta caduca. Esey kiermen cu por skirbi e nomber di un persona ariba e fecha di su cumpleaño y tur aña por keda usa e kalender, pasobra e no ta mara na e aña, pero solamente ta mustra e luna y dianan di e luna.

E meta di e benta di e kalender aki ta pa recauda fondo pa asina e fundacion por cubri e gastonan necesario pa nan por sigui yuda e cachonan cu ta wordo maltrata y cu mester di ayudo urgente.

Den un entrevista den luna di februari di e aña aki cu Zoey Konijn, fundador y presidente di Luna Foundation, el a conta Bon Dia Aruba con ta bayendo cu e fundacion y kico ta e plannan pa e aña aki.

Konijn a conta cu e aña aki nan a cuminsa cu un expansion di e santuario, pues e tereno a bira mas grandi y e obhetivo di e expansion aki ta pa porfin nan por cuminsa cu e cas di retiro cu nan kier haci pa e cachonan bieu, y tambe un cura di hunga pa e puppynan pa separa e cachonan chikito for di esunnan bieu.

El a remarca tambe cu nan tin un hospital ariba nan tereno cu tabata t’ey for di aña pasa caba, pero e no tabata activo ainda. E hospital aki ta solamente pa e cachonan cu ta riba nan tereno y na momento cu e cachonan mester atencion medico, nan no mester Sali bay hospital cu e cacho, pero e veterinario por yega cerca nan y atende e cachonan den nan mesun hospital.

“E plannan pa e aña aki ta pa cuminsa cu e cas di retiro y zorg pa nos por yuda un paar di puppies mas pasobra tur otro fundacion cu ta rescata cacho chikito, tur ta yen y si nos por yuda door cu nos tin e espacio, nos kier yuda,” Konijn a enfatisa.

Pero pa por logra esaki nan tin mester di boluntario. E topico di boluntario ta keda un problema y Konijn ta subraya cu hopi hende ta puntra pa ayudo pero niun no ta ofreciendo pa yuda e fundacion cu tin echt mester ayudo den e parti aki. “Mas boluntario nos tin, mas cacho nos por yuda.”

Aworaki Luna Foundation tin mas di 100 cacho riba su tereno y tur dia, Konijn ta riba tereno cu un otro hende of si no su so. “E ta pisa. Mi no ta keha, mi stima haciele, pero e no ta facil. Mas boluntario nos haya cu por yuda nos, mas cacho cu ta eyfo cu nos por yuda,” el a enfatisa.

E ‘Birthday Calendar’ di Luna Foundation ya ta disponibel y cantidad ta limita. Pa mas informacion por bishita e pagina oficial di Luna Foundation of por yama na 592-9339 of 593-1039 pa reserva un kalender.