Prome minister kier pa gobierno Hulandes exonera Aruba su debe pa por bay di acuerdo cu e Rijkswet Arubaanse financieel Toezicht. Na juli 2020 a yama tur partidonan politico y gremio pa participa di lo bay Hulanda pa fia placa pa via di e lockdown. E tempo ey nos prome minister mes a toca y e mes a baila paso no tabata tin un participacion real. E intencion no tabata pa crea “draagvlak”. Al contrario e intencion tabata ta pa haci tur esnan invita coresponsabel pa entrega di nos autonomia. Nos prome minister sinembargo lo mester a sinti cu su plan macabro no tabata tin sosten y p’esey den un forma scondi a bula bay Hulanda pa firma un acuerdo. E tempo ey opinion di Parlamento no tabata conta sino e 1 biyon florin cu kier a fia for di gobierno Hulandes. Mas placa y que siga la fiesta.

Laga nos no lubida e acuerdo di COHO di e diabierna scur dia 13 di november 2020. Si nos mira bon cu mayoria di e puntonan di e landspakket a wordo ehecuta caba. Un di e acuerdo di e landspakket ta husticia caminda tin casi 90 marechaussee caba na Aruba, mientras nos Cuerpo Policial tin scarsedad di polis y intencionalmente a keda sin tene opleiding pa polis. E acuerdonan den husticia a cuminsa cerca e minister di husticia di AVP y a sigui cu minister di husticia di POR y asina hinca nos husticia den man di e Hulandesnan. Mira den nos hospital tambe tin yen di Hulandes ta traha. Un otro acuerdo di e landspakket cu gobierno ta pusha ta e prestatiemanagement. Nos por corda tambe cu nos prome minister a core bisa cu COHO no ta sigui sino e Onderlinge Regeling y cu RAFT lo no bin mas. E suerte di gobierno ta cu nan mester sigui deal cu e gobierno Hulandes aunke ta demisionario y pa e aña aki lo no tin cambio den e gobierno Hulandes.

Partido MEP a core campaña na 2001 cu Aruba ta bancarota. Partido MEP a drenta gobierno y contra di acuerdo di bon gobernacion a subi mercado internacional uzando nos banconan local como intermediario pa fia mas cu 1.4 biyon florin. Partido AVP a drenta gobierno na 2009 y a sigui e mal ehempel di partido MEP y a fia 1.8 biyon florin uzando nos banconan local como intermediario atrobe. Ta mas cu logico pakico awe tin cu paga un interes asina halto pa fia placa paso mester paga interes na banconan local y tambe interes na e banconan internacional. Akinan ta unda e mega debe a wordo crea y p’esey nos di partido Curpa ta bisa cu partido MEP y partido AVP ta coresponsabel pa e mega debe, paso nan firma ta poni bao di e prestamonan aki. E mesun mal ehempel a sigui cu e prestamo pa WEB y Aeropuerto paso intermediario ta gana miyones sin haci nada. Esaki ta e motibo pakico awe nos awa y electricidad ta asina caro. Esey no ta nada paso e companianan estatal a wordo usa como garantia pa haci prestamo den exterior. No ta por nada den COHO ta papia cu si gobierno no por paga su debenan anto por cuminsa bende nos companianan estatal pa paga debe. Esaki lo trece pan di e trahadornan di tanto WEB, ELMAR, AAA na peliger.

Tristo ta pa constata cu pais Aruba a ricibi biyones na entrada y en bes di inverti a prefera di malgasta fondonan publico pa complace “friends and family” pa na final di cuenta hinca nos pueblo den mas debe ora a fia placa pa ehecuta proyectonan PPP manera Green Corridor, Watty Vos Boulevard, Warda di polis Noord y Santa Cruz, e waf di Barcadera y hospital. Malgastamento tabata na ordo di dia pa e “feestvierend ten ondergaan” sigui mientras riba lomba di pueblo a bin cu tur tipo di medida. Join the MEP and and see the world ta un realidad. Ta gasta placa na biahamento y despues ta bin cu gañamento di tur e logronan di nan biahe. Despues di 6 aña nos no ta mira ki logro e gobierno aki tabata tin. E logro mas grandi di nos gobierno ta medida y un otro realidad ta e BBO na frontera cu prome cu wordo introduci a aumenta costo di bida substancialmente y otro luna nos lo por mira un otro aumento riba prijsnan di mas cu 14%. E aumento di inflacion di 5.9% ta cos di hari paso si paisnan grandi ta papia di un inflacion di riba 10 %. Con lo ta posibel cu Aruba e inflacion ta menos mientras tur cos ta importa.

Nos tin un coalicion cu ta balia riba ordo di gobierno y nan no tin e curashi di bay contra decision di gobierno. Un gobierno cu no ta honra Dios no por biba bao di e bendicion di Dios. Aruba tin 37 aña cu Status Aparte pero en bes di nos gobiernonan a traha pa bienestar di nos pais a traha pa nan propio interes. Pueblo no por bisa nada paso pueblo lo wordo persigui y ta busca tur moda di silencia e bos di pueblo. Ainda e supuestamente cristiannan den parlamento ta sigui defende gobierno y ta complice di e maldad di gobierno. Ora ta toca nan no ta worry paso pa un tiki placa nan ta prefera di drumi 3 riba un kingsize bed cu huur un camber apart. Pueblo di Aruba partido Curpa un partido di famia y e unico partido cu ta para pa leynan di Dios. P’esey mes partido Curpa ta keda e unico alternativa.