Panel di clima IPCC di Nacion Uni ta apunta vice-presidente Hulandes pa prome biaha den 16 aña

(NLTimes)—Cientifico Hulandes, Bart van der Hurk, a ser apunta como vice-presidente di un di e gruponan di e panel di Nacion uni yama “Intergovernmental Panel on Climate Change (IPCC).” Esaki ta e prome biaha desde 2007 cu un Hulandes a tuma e posicion aki. Van der Hurk, ken ta director cientifico di e instituto di conocemento Deltares, sa cu esaki ta un trabao “influencial” y ta kere cu Hulanda por haci un gran diferencia.

“Claro cu Hulanda ta un experto den maneho di awa,” segun van der Hurk. “Con nos mester prepara mundo pa e consecuencianan di cambio di clima ta un pregunta importante cu nos por contesta.” Tin un deseo fuerte entre e grupo nobo di IPCC, el a bisa, pa e reportahenan nobo mustra concretamente con paisnan por adresa e problemanan di clima.

IPCC a ser estableci pa NU pa asina registra cambionan di clima y su efectonan. Den un ciclo, e gruponan di trabao di IPCC ta produci rapportnan climatico grandi. E ultimo ronda ya a ser completa. E siman aki na Nairobi, IPCC a discuti kico e ciclo nobo mester mustra. Ta spera cu esaki lo dura te 2030.

E panel a sigui produci rapportnan mas comprensivo durante e ultimo añanan. Van den Hurk ta bisa cu esey ta pasobra mas y mas rapportnan cientifico ta riba cambio di clima. “Cu e ciclo nobo aki, nos echt kier tuma e siguiente stap,” van der Hurk ta bisa. “Menos comprensivo, pero involucrando lectornan por medio di mustra unda ta posibel caba pa bira mas sostenibel. Cientificonan di clima mester dicidi cua. topiconan nan kier cubri den e rapport y cual no. Esey ta algo serio y ta tuma curashi.”

Mientras tanto, van der Hurk tambe ta consciente cu no tur idea por ser implementa. Como vice-presidente di e grupo di trabao, e ta un conductor, manera e ta splica. “Bo no ta produci un nota bo mes, pero nos ta sigura cu notanan ta sincronisa,” el a enfatisa. E ta custumbra di esey toch, e ta haci esaki den su trabao na Deltares, y e ta conductor di un coro tambe.

E informacion di e rapportnan di IPCC ta hopi importante pa negociacionnan di legisladonan, incluyendo na e evento di COP Climate Summit. Entre otro, IPCC a conclui cu entre 2030 y 2035, mundo lo ta 1.5 grado mas cayente cu e tabata prome cu e era industrial a cuminsa. Lidernan global a caba di bay den acuerdo pa limita e calientamento global pa 1.5 grado of te na un maximo di 2 grado.