Mediante un comunicado di prensa, ayera atardi Ministerio Publico a informa cu riba 19 di juli ultimo comunidad di Aruba a ser sacudi pa morto violento di un muhe di 49 aña y un homber di 35 aña.

Bao guia di Ministerio Publico, polis a investiga morto di e dos personanan aki.

Den cuadro di esey a haci tambe investigacion tecnico forensico amplio pa haya sa kico exactamente a sucede e dia ey.

Investigacion a mustra cu e homber M.J.G.M. a mata e muhe L.G.C.R. den su cas na Washington y cu despues el a comete suicidio na costa di Bushiribana.

No tin ningun indicacion di envolvimento di un tercer parti den asesinato di señora C.R.

Ayera atardi Ministerio Publico tambe a pone famia di señora na haltura di e conclusionnan di e investigacion.

Tabata dia 19 di juli mediante un comunicado di prensa ora Cuerpo di Polis a informa cu despues di 6’or di mainta di e dia ey central di polis a haya e notificacion cu tabatin un auto para na Bushiribana y banda di dje tabatin un hende homber abao na suela y no ta tabata dunando señal di bida.

Pa motibo di e situacion aki nan a despacha patruya di polis di biaha na e sitio di e sucedido. Na yegada di e patruya, ta constata cu en berdad tin un curpa sin bida banda di un auto.

Recherche, polis tecnico y dokter forensico a presenta na e sitio pa cuminsa e investigacion. Alabes departamento di slachtofferhulp tambe a ser poni na altura.

Investigacion a continua na unda na prome instante no por a identifica e curpa. Debi di esaki a bay controla na ken e auto ta pertenece y asina a bay na e cas di e persona cu e auto ta registra y eynan a topa e curpa sin bida di un dama den e cas.

Segun Polis a señala e mesun dia, e caso aki tabata den pleno investigacion y nan no por informa cu exactitud kico por a pasa.

Di e dos persona aki nan a indica cu tabata trata di Jorge Miguel Garcia Moreno ken segun otro medionan di comunicacion a informa cu tabata traha como personal trainer den un gym conoci, Garcia Moreno tabatin 35 aña y a nace na Venezuela dia 20 di april 1988.

Tocante e dama, su nomber tabata Leilia Gregoria Contreras Romero y el a nace dia 01 augustus di 1974 na Aruba, tabatin 49 aña y tabata traha como fisioterapista na Saba.

Otro medionan local no tabata descarta cu por ta cu Garcia Moreno lo a asesina Contreras Romero y despues a bay te area di Bushiribana pa kita su mesun bida, mientras tanto, esey no tabata confirma te ayera ora cu e investigacion di Ministerio Publico a conclui cu lamentablemente, esey si tabata e caso.