E manera mas fasil pa baha gasto den gobierno ta privatisa departamentonan. Berdad ta baha gasto pero despues e ta bolbe cay riba lomba di pueblo ora cu empleadonan di e empresanan aki kier aumento di salario.
Nos por mira kico a pasa na tur e companianan estatal. E trahadornan di e companianan estatal a bay laga empleadonan publico lew pa locual cu ta trata salario. E companianan estatalnan a bay dilanti door di cao cu nan a firma. For di unda e placa ta sali pa aumento di salario di e companianan estatal aki? Nos ta corda cu recien cu e departamentonan a wordo privatisa nan tabata tin e mesun privilegio cu e empleado publico pero si nos mira e dia di awe nan a laga e empleado publico lew den salario. Nos por corda ora cu a kita e 12.6% for empleadonan publico, solamente e empleado publico y e trahadornan di hospitaal a sacrifica.
E problema mas grandi di nos gobierno ta cu interes di partido politico ta bin na prome lugar. E gobierno bow signatura di partido mep tin 6 aña den gobierno y nos no por mira ningun projecto den e gobierno aki cu por yuda nos pueblo. Si nos por mira cu gobierno ta sigui maltrata pueblo di Aruba. Si den paisnan grandi e inflacion ta riba 10% aki na Aruba ta papia di 5.9% di inflacion y ta impossibel kere paso tur cos ta importa akin a Aruba. Partido CURPA ta di opinion cu e percentahe di inflacion ta hopi mas halto na Aruba.
Mientras ta gaba cu entradanan miyonario cu gobierno ta haya di turismo, toch nos Prome-minister ta laga sa caba cu Aruba no tin e 916 miyon pa paga Hulanda. Durante e ultimo 6 añanan di gobiernacion gobierno a haya mas cu 1.5 biyon florin den caha. Si Aruba no por paga y no bay di acuerdo pa firma e RAft, anto e mester paga 8% na interes. Un interes riba un mega debe di 6.3 biyon florin cu nos gobiernonan a crea for di 2001. Gobierno no por paga e debe, pero no tin placa tampoco pa drecha nos carreteranan, e planta di purificacion na Bubaliplas, schoolnan den decadencia, pa eigen bijdrage pa nos pensionadonan y esnan cu ta biba di onderstand, esnan cu no tin trabao y ni un aumento drechi riba pensioen. Gobierno ta bin cu un BBO na frontera pero ya a hisa gastonan di e differente ministerionan. Si nos mira e projectonan PPP, tur tin un termino di 20 aña pa paga.
Cada bes cu gobierno refinancia nos debenan nacional e interes ta subi y e mega debe di pais Aruba no ta baha. Di e 23 biyon florin cu a drenta den caha pais Aruba durante e ultimo 22 añanan solamente 560 miyon florin gobierno a usa pa projecto. Kico a pasa cu tur e biyon florinan aki? Unda tur e placanan aki a bay? Ora nos papia di flight by night nos ta kere cu e miyones di florin cu a drenta den caha di gobierno a desaparese for di anochi pa di dia. E debe di pais Aruba tin firma di partido mep y partido avp. Un cos ta sigur, e no a yega cerca e pueblo. E unico cos cu si ta yega cerca pueblo ta medida y nada otro.
Nos pueblo ta bibando den miseria y situacion ta birando pio. Nos gobierno no tin solucion y no ta interesa den dolor di pueblo. E situacion ta bayendo for di man y esaki lo trese consequencia pa pais Aruba. Dios ta scucha oracion di un pueblo den dolor. Ta di lamenta cu nos tin parlamentarionan cu ta hunga cristian y ta sigui defende nan gobierno den su maldad. E parlamentarionan aki ta sigui apoya gobierno den nan maldad. Un gobierno cu pa medio di mentira a yega na poder lo cosecha e mentiranan aki.
Dios lo no permiti nada keda scondi y tur cos lo sali na claridad. Ora di paden mes bo tin problema lo bo no por spera nada otro. Esaki ta tempo di husticia di Dios. Pueblo di Aruba laga nos dobla nos rudiya y busca cara di Dios y Dios lo sa di contesta oracionan di un pueblo cu ta wordo maltrata. E unico alternativa ta partido Curpa.
