Den ultimo lunanan, den medionan di comunicacion internacional y den mundo di aquacultura a circula e noticia cu compania Mericano basa na Boston, Innovasea a anuncia cu exitosamente a yuda Petros Aquaculture obtene aprobacion di gobierno pa lansa un criadero di pisca riba lama habri, di 3mil ton metrico (MT), como ocho kilometer leu di costa di Aruba.

E criadero, un “open-ocean farm,” ta bay cria northern red snapper usando e tecnologia di “SeaStation” di Innovasea. Ta bay construi e criadero den tres fase, y ta bay conta cu 16 SeaStation sosteni pa un incubador (hatchery) riba tera cu un futuro meta di crecemento pa 9mil MT di biomasa y diversificacion den otro especie y cultivo di yerba di lama, segun un comunicado di prensa di Innovasea.

“Nos ta entusiasma di ta partner cu Petros pa crea e prome criadero di pisca basa riba ocean na Aruba,” senior vice-president di Business Development, Langley Gace a bisa. “Esaki ta un proyecto importante pa e pais y e region y nos tin tur confiansa cu nos experticio den lama habri y nos maneho di webo-pa-cosecha proba pa criadero di pisca lo yuda sigura su exito.”

Fundador y presidente di Petros, Gunnar Bracelly, den un forum riba oportunidadnan di inversion y comercio Afro-Caribense, a comparti cu e tres fase di e proyecto aki ta bay involucra un inversion total di 31 miyon dollar durante siete aña, di cual 8 miyon dollar ta bay ta equity financing y 23 miyon dollar financiamento cu debe.

“Nos ta afortuna di tin un partner fuerte den Innovasea, un lider di industria den criadero riba lama habri cu experiencia proba cu especienan di awa cayente manera e Red Snapper,” Bracelly a bisa den un comunicado.

Petros a scoge e especie di pisca northern red snapper pa motibo di e gran demanda cu tin pa esaki y e prijs cu e ta comanda, particularmente pa motibo di su disponibilidad limita pa temporada, Gace a bisa. El a agrega cu plataformanan di aquacultura sumergi den ocean habri, manera e SeaStation, ta traha bon pa Aruba pasobra nan ta efectivamente invisible ora nan ta sumergi.

“Nan ta un fit great pa un lugar manera Aruba unda ta importante pa preserva e paisahenan bunita pa esnan cu ta yega cu vacantie,” Gace a bisa.

Manera ta conoci, turismo ta e principal fuente di entrada pa Aruba, proveyendo mas cu mita di e producto interno bruto (GDP) di nos isla, segun e Unidad di Inteligencia Economista, Moody Analytics como tambe WorldData.

E proyecto di Petros ta bay enfoca riba parti di e mercado turistico aki mientras tambe ta reforsa e seguridad di alimento di Aruba, segun Innovasea a bisa. “Pa por depende riba e capacidadnan di servicio completo di Innovasea ta permiti nos team pa enfoca riba implementa e vision ambicioso di diversifica economia Arubano y converti den e prome catalista pa un revolucion di aquacultura den henter e region di Caribe,” Bracelly a bisa.

Petros tambe ta bay ofrece su pisca na e cantidad di barco crucero cu ta para na Aruba. Esaki ta bay sostene e esfuerso di industria crucero pa reduci su footprint di carbon door di procura pisca fresco for di fuentenan local.

Innovasea ta bin trahando activamente pa yuda companianan ricibi e permisonan necesario pa aquacultura offshore. Na maart ultimo, a anuncia cu exitosamente a yuda Benguela Blue Aqua Farming sigura permiso pa cria salmou Atlantico den net pens sumergible ocho kilometer leu di costa di Namibia.

Ta ser bisa cu Innovasea ta un compania impulsa pa tecnologia vanguardista y un pasion pa investigacion y desaroyo. “Innovasea ta revolucionando aquacultura y avansando e ciencia di tracking di pisca pa haci nos oceannan y ecosistemanan di awa dushi sostenible pa generacionnan futuro. Cu mas cu 275 empleado mundialmente, nan ta provee solucionnan end-to-end pa criadero di pisca y investigacion di especienan acuatico – incluyendo ekipo di calidad cu ta eficiente y duradero, servicionan di consulta cu expertonan y plataforma- y productonan innovativo cu ta duna data, informacion y entendimento profundo,” e compania a bisa. “Di tera pa ocean habri, Innovas

Nan ta sigura cu esaki ta rekeri mas cu djis entrega e tecnologianan acuatico mas avansa na mundo. “E ta nifica cu continuamente ta aplica conocemento den ciencia y ingenieria, tracking di pisca y operacionnan di criadero pa desaroya e sistemanan ideal pa cada sitio. E ta nifica traha banda di clientenan pa cultiva y protege poblacionnan di pisca. Y ta nifica conscientemente diseña producto y servicio pa duna back mas na naturalesa di loke nos ta tuma.”

Petros ta buscando inversionistanan adicional pa e proyecto, y ta habri pa tanto equity y debt financing pa e etapa inicial. Pues ainda e proyecto no tin un fecha ya cu apenas ta den etapa di concepcion.

Peliger pa naturalesa

Criadero di pisca riba ocean habri, conoci como offshore aquaculture, por presenta varios peliger pa medio ambiente. Por ehemplo, e criaderonan por experiencia escape di pisca cu ta kibra e net of otro infrastructura di e criadero. E piscanan cu ta huy por competi cu especienan nativo pa recursonan, plama malesa y reproduci cu e poblacionnan salvahe, potencialmente diluyendo nan diversidad genetico.

Ademas, densidadnan halto di pisca den criaderonan riba lama habri por promove transmision di malesa y parasito entre e piscanan. Si ta introduci of transferi e patogenonan aki na poblacionnan salvahe, esaki por tin efectonan devastador riba e salud general di ecosistemanan local. Introduccion di especienan no-nativo den lama habri pa operacionnan di aquacultura por conduci na establecemento di especienan invasivo cu ta afecta ecosistemanan local y ta domina especienan nativo. E criaderonan tambe por atrae predadornan marino manera parha di lama buscando un fuente facil di cuminda. Esaki por crea conflicto entre operacionnan di aquacultura y poblacionnan local salvahe.

Igualmente, criadero di pisca ta crea contaminacion di lama, incluyendo resto di cuminda, feces y kimico den e awa rond di esaki. E contaminantenan aki por conduci na enrikecemento di nutriente, nivelnan reduci di oxigeno, y alteracion den calidad di awa, impactando negativamente e habitatnan marino y biodiversidad.

Operacionnan di criadero di pisca a gran escala por rekeri cantidadnan significante di hariña y azeta di pisca, hopi biaha esakinan ta bin di pisca salvahe captura. Esaki por pone presion adicional riba cantidad di pisca marino y exacerba preocupacion pa sobrepesca.

E uso di antibiotica, pesticidad y otro kimico pa controla malesa y parasito den criadero di pisca por conduci na e desaroyo di bacteria resistente pa antibiotica y contamina e ambiente rond di esaki.

Di mesun manera, e instalacion di infrastructura pa criadero di pisca den lama habri por altera fisicamente e fondo di lama y e habitat rond di esaki, afectando ecosistemanan y especienan local cu ta depende riba e areanan aki pa shelter y cuminda.

Finalmente, criadero di pisca riba lama habri ta suceptible na e impactonan di cambio climatico, manera acificicacion di ocean, elevacion di nivelnan di lama, y cambionan den temperatura di awa, cual por pone mayor stress riba tanto e criadero como e ambiente marino rond di esaki.

Minister di Naturalesa ta desmenti
 Ayera den oranan di atardi, Bon Dia Aruba a tuma contacto cu minister di Naturalesa, Ursell Arends pa puntra tocante e noticia aki y si e permiso ta mara na un ontheffing, y con lo evalua e impacto riba naturalesa. Arends a indica cu no ta berdad cu e companianan Petros y Innovasea a ricibi un permiso pa e criadero di pisca aki, y tampoco nan a pidi un ontheffing.