Den edicion di ayera di Bon Dia Aruba, a trece dilanti e suplica di Elmar NV relaciona cu accidentnan di trafico unda ta destrui palo di luz of di coriente. A menciona cu esaki ta sucediendo cu mas frecuencia, loke ta crea molester pa residentenan. Asina mes, dialuna a bolbe registra un tipo di incidente asina.
Dialuna madruga a drenta informe di un accidente dilanti Santa Cruz Bar Restaurant na Santa Cruz, mesora a dirigi un patruya na e sitio.
Na yegada di e patruya a bin constata e palo di luz kibra, pero e vehiculo cu lo a kibra esaki a bandona e sitio. A avisa Elmar y esaki a presenta mesora na e sitio y a cuminsa cu trabaonan di reparacion. Polis di trafico lo sigui investiga e accidente aki.
Elmar ya caba a indica cu e cantidad di casonan di conductornan cu ta “hit & run” e palonan di luz di caya of coriente ta birando mas y mas preocupante, specialmente den casonan unda ELMAR no ta haya informacion riba e daño causa na e palo di luz, debi cu e suma ta varia dependiendo di e situacion, si ta un palo di luz of un palo di coriente e cual tin componentenan di coriente den dje. Consecuencia di esaki ta cu e ta laga e area alrededor di e palo y e grid di coriente den un situacion vulnerabel.
Ta p’esey cu nan kier pone enfasis riba e importancia di seguridad den trafico, debi cu gran parti di e grid di coriente di Aruba ta riba tera.
