Durante un conferencia di prensa, prome minister Evelyn Wever-Croes a confirma cu ta prolonga e ciere di frontera aereo cu Venezuela.
Ta evalua pa continua e ciere aki cada tres luna, pues despues cu e ultimo tres luna a pasa, awo a tuma e decision pa prolonga esaki.
Segun Wever-Croes, Aruba a indica cu no ta cla pa habri frontera aereo ainda, y pues a prolonga e ciere cu tres luna mas. “E comision cu nos tin di grenssluiting Venezuela a duna e conseho aki, nos ta trahando riba e diferente aspecto pa por yega na un pre-apertura. Ora cu ta asina leu, nos lo anuncia,” el a bisa. “Y berdad, den e comision nan ta trahando riba reapertura di e frontera den fase. Den e prome fase, nan ta contemplando carga. Y aworaki nan ta mirando con ta e miho manera pa esaki por pasa.”
Ademas, Wever-Croes a bisa cu probablemente lo por anuncia dentro di poco cu frontera aereo pa carga por wordo habri, bao ki condicion, etc. El a bisa cu mester negocia esaki cu autoridadnan Venezolano tambe, cu di nan banda a indica cu nan ta dispuesto pa negocia esaki. “Esey toch ta hopi bon, pasobra si nan ta dispuesto nos por yega na algo,” Wever-Croes a comenta.
El a indica cu e hecho cu a prolonga e ciere cu tres luna no lo stroba e negociacionnan, “dus si e comision keda cla den dos siman, hunto cu Venezuela nan acorda e condicionnan, nos por haci e cambio ey sin mucho problema.”
Wever-Croes a enfatisa cu e problema ta cu e vuelonan directo entre Aruba cu Venezuela “no ta posible.”
“Aworakinan nos ta compronde cu tin localnan cu kier haci vuelonan via Corsou pa Venezuela, y esey Directie Luchtvaart ta weitando pa toets e, e aspectonan tecnico di kico ta flight plan, kico ta plan di origen, kico ta e caminda cu e ta yega. Kiermen esaki ta un discusion un poco tecnico. Pero ta mirando e ora si esey ta posible,” el a comenta. “Si e no ta posible, e ora e avion lo tin cu traha un flight plan Aruba-Corsou y traha un otro flight plan Corsou-Venezuela pa cumpli cu e rekisitonan.”
