E casonan den corte di e dos proyectonan hotelero cu ta paraliza momentaneamente ta sigui den atencion publico. Di e veredicto den caso sumario cu tabatin e siman aki den e caso di fundacion ABC contra Natura Development NV, ta sali algun detaye interesante. Entre otro por lesa den e sentencia cu e compania a cuminza cu e obra di reconstruccion hasta promer cu nan a haya e permiso pa construi (aanlegvergunning) cual tabata responsabilidad di e ministro encarga cu Infrastructura y Planificacion, o sea nos Promer Ministro. E permiso duna dia 16 di juni 2023 a ser pidi dia 18 di januari 2023. Esaki mientras desde 2018 caba e construccion di e hotel mes a cuminza y cu desde e tempo ey caba tabata ambiciona di construi e tunel pa huesped por a yega na e beach, y e posibilidad di transforma e costa di baranca den un beach di santo. Manera nos a comenta den un anterior Editorial, e deseo aki di haya e pida costa aki pa desaroya como beach, tabata conoci caba na 2010.

Esaki ta indica nos cu henter e proyecto aki tabata tuma lugar den parti, como si fuera esun no tin nada cu haci cu e otro, pasobra e permiso pa traha e tunel tabata duna caba. Ta te na ultimo a pidi anto e parti di traha e beach mes. Nos ta admira si e rapidez cu cual na ultimo aki, den menos di mitar aña, el a keda cla, loke ta significa cu e critica constante riba gobernacion pa nan lentitud y burocracia aparentemente no semper ta na su lugar, pasobra ora di berdad mester, anto gobernacion sa con pa move… Solamente, nos lo desea cu den otro asunto tambe nos por mira e mesun rapidez y eficacia aki, pero nos ta teme cu esey lo ta demasiado pa pidi.

Otro aspecto interesante, cu nos a señala anteriormente tambe, ta aparece den e sentencia, esta cu e permiso duna pa e mandatario encarga cu entre otro Infrastructura y Planificacion ta indica como promer condicion cu e compania mester di un ‘ontheffing’ di e ministro encarga cu asunto di Naturaleza, si ta trata di caso di kita o destrui especie cu tin proteccion legal. Manera nos por a tuma nota den e declaracion di e ministro aki den rueda di prensa na e sitio di e tereno disputa, den su comunicacion cu e compania a declara na su persona cu e compania lo tabatin tur permiso necesario. Sea no a lesa e permiso duna (e aanlegvergunning) bon, o a pensa cu lo por a impresiona cu e ponencia ridiculo ey. Contal cu dilanti huez esey tampoco a yuda, ya cu por lo pronto lo no por continua cu e obra, pasobra no tin un ‘ontheffing’ duna pa e ministro encarga cu Naturaleza.

Y tin mas asunto interesante aki pa explora. For di e hechonan señala, entre otro den e sentencia menciona, por a conclui cu a cuminza cu e obra den disputa hasta promer cu a haya e permiso duna na mitar di juni. Kico esaki ta bisa nos? Cu tur e tempo ey no tabatin supervision riba kico e compania tabata haci? Y ken mester a hiba e supervision ey, y a keda sin haci nan trabao? Esun encarga cu e supervision ey tabata e mesun departamento di Infrastructura y Planificacion, cu na october 2019 a duna e compania un ‘toezegging’ (compromiso) cu nan por a traha e beach desea. Y ken tabata ministro encarga cu Infrastructura y Planificacion na e fecha menciona ey? E mesun ministro cu na 2010 caba a haya di tende cu no ta recomendable pa duna e compania acceso na e tereno y costa ey… Sin embargo, nos mester kere sin mas cu despues e asunto aki a keda drumi te recientemente, pa de repente gobierno lanta for di soño, mira cu tin compromiso haci y a otorga dentro di poco tempo e permiso pidi? Por ta, pasobra en todo caso ta resulta cu e departamento di Naturaleza y Medio Ambiente a duna conseho no mas dia 23 di januari 2023, loke ta crea e impresion cu entre 2019 y inicio di 2023, tempo cu e peticion pa e aanlegvergunning a bin aden, e departamento aki no tabatin conocimento di e compromiso haci pa DIP?

Nos ta haya e impresion cu di berdad e mandatario concerni mester cuminza pasa un basora den e departamento di Infrastructura y Planificacion, pa caba cu e practica dudoso aki di haci compromiso cu ta keda scondi te dia e asunto rementa. Den e tipo di trabao aki, cu tur tipo di documentacion registra na e departamento mes, ademas na registro di bienes inmueble y na oficina di notario, ta imposible pa tapa tur cos te eternidad. Awor nos por comprende mihor e indignacion di parti di e compania, cu tin años ta operando bao di cierto ‘compromiso’ haci di banda di representante di gobernacion, cu fuera di e departamento por inclui tambe mandatario y asesor(nan) di esaki, aunke e hecho cu a logra haya hende asina leu pa haci e tipo di ‘toezegging’ aki no ta duna derecho, loke awor dilanti huez e empresa a bin ripara di mal manera.

En todo caso, mirando e situacion na e departamento menciona, unda tin un director sinta na cas sin cu nos mag sa ta kico a pasa, ta pone nos haci e pregunta aki: e director a bay cas relaciona cu e caso aki, o tin mas asunto pa trata ainda?