Nos ta den luna di juli y nos gobierno no tin un plan pa saca nos Aruba dushi tera for di e desastre di debe cu gobierno a hinca nos pueblo aden. Gobierno ta gaba cu turismo a laga 1.3 biyon florin den economia di pais, pero pueblo no ta mira unda e placa ta bay. Pueblo di Aruba tin 6 aña ta wordo suta cu tur tipo di medida cu ta crea mas entrada pa gobierno pero na mesun momento debe nacional ta sigui crece. Mas entrada y mas debe, con esey por? Partido MEP nunca tabata tin plan di maneho con lo drecha e situacion financiero di pais Aruba paso e expresion di campaña di conoce e materia y a studia e materia y cu lo goberna sin medida tabata simplemente un otro mentira. Prome minister a admiti cu pais Aruba no tin placa pa paga e debe di 916 miyon florin cu Aruba debe Hulanda cu mester wordo paga no mas tarda cu 10 di october 2023.

Esaki ta sin conta e prestamo riba mercado internacional cu a yega na un total di 1.5 biyon florin na aña 2020. Aruba su debe nacional ta asina halto cu ta paga solamente interes y ta sigui refinancia debenan cu ta caduca. Si sigui asina Aruba lo no por ni paga interes mas. E fiamento riba mercado internacional ta haci cu gobierno ta paga dobel interes. Mester paga e banco local y tambe interes na e banco den exterior. Historia ta demostra cu partido MEP ta un partido di medida. E logro di Status Aparte cu partido MEP ta gaba di a lucha p’e ya no tin balor mas paso e maneho cu e gobierno actual ta pusha nos Aruba dushi tera bira un municipio Hulandes y asina Aruba lo perde su identidad den reino Hulandes.

Aruba ta bibando den un caos y sigur bao di maneho di e gobierno aki pueblo no por spera un cambio. Cada dia cu pasa situacion social ta bira pio. Tin un aumento di desempleo bao di esnan di 58 aña bay ariba cu no ta cobra pensioen y mas pio ta cu pa via di nan edad no ta haya trabao. Costo di bida ta asina halto cu ta haci cu e situacion social lo por bay for di man na cualkier momento. Nos sa cu pueblo a perde su speransa den maneho di e gobierno aki paso durante 6 aña di gobernacion e unico noticia cu pueblo ta haya ta mas medida. Kisas ta necesario pa pueblo pasa den e experencia aki pa asina mira cu pa un partido socialista/comunista e bienestar general di nos pueblo no ta importante.

Gobierno no sa con pa gaña mas paso mira cuanto tempo a pasa sin cu a haci nada cu e planta di purificacion na Bubaliplas. Ta bringa un hotel cu kier traha un beach pero no ta haci nada cu e planta di purificacion na Bubaliplas. Awa sushi ta bay lama ta haci mas daño na nos medio ambiente cu e beach cu kier traha. Pa scapa un ex minister di turismo si tin placa pa tira afo pero no tin placa pa nos grandinan na SABA y tampoco pa esnan cu no por paga nan remedi na botica. Esnan cu no tin trabao tampoco ta haya ayudo. Salud di nos grandinan y esnan cu no tin trabao no ta importante.

Partido MEP ta kibrando di paden paso tin hopi malcontento bao di e simpatisantenan di e partido geel. Nos centro di ciudad a bira un ghost town. Nos careteranan ta den mal estado. Decadencia den nos enseñansa, mas di nos maestronan ta bandona Aruba pa un miho porvenir. Nos miho profesionalnan ta bandona nos isla. Simplemente nan ta sinti nan mes insigur y no tin confiansa den gobierno.

Gobierno ta biba den pasado pero na man di e gobierno actual e futuro di Aruba ta scur. Nan bara magico pa manipula ya no tin poder mas. Un cos ta sigur mas nan keda mas nan lo destrui nan mes. Pronto nan lo bay pa nunca mas regresa. Un gobierno cu no ta respeta leynan di Dios ta paso nan no tin temor di Dios. E huicio di Dios no ta bay bin sino e t’ey caba. Esun cu lanta falso testimonio lo tin cu paga pa e consecuencianan. Pueblo di Aruba laga nos dobla nos rudia y busca Dios di curason. E pueblo cu busca Dios di curason sigur tin speransa p’e. Partido Curpa ta e unico alternativa.